Ջանիկը ցանկացել է կաշառել տուժողին, բայց դրա փոխարեն բռունցքով հարվածել է քննիչի դեմքին

Էրեբունի և Նուբարաշեն վարչական շրջանների ընդհանուր իրավասության դատարանում Արտուշ Գաբրիելյանի նախագահությամբ ավարտվել է Ջանիկ Գուլամիրյանի ու Անահիտ Բեգլարյանի գործի դատավարությունը:

Վեդի քաղաքի բնակիչ, նախկինում մի քանի անգամ դատապարտված Ջանիկ Գուլամիրյանը 2012 թվականի հուլիսի 12-ին բռնություն է գործադրել իր ծանոթ Համլետ Վարդանյանի նկատմամբ, դանակի գործադրմամբ կատարել խուլիգանություն, որի համար հաջորդ օրվանից՝ հուլիսի 13-ից գտնվել է կալանքի տակ՝ «Նուբարաշեն» ՔԿՀ-ում: Այս մասին գրում է 1in.am-ը: 

Կալանավայրում Ջանիկը մտադրվել է Արարատի և Վայոց Ձորի մարզերի ընդհանուր իրավասության դատարանում քննվող քրեական գործով տուժող Համլետ Վարդանյանին կաշառել, առաջարկել, որ նա սուտ ցուցմունք տա, իբր՝ իր նկատմամբ Ջանիկը դանակի գործադրմամբ բռնություն չի իրականացրել:

Որպես իր մտադրության իրականացնող՝ Ջանիկն ընտրել է ընկերուհուն՝ Անահիտ Բեգլարյանին: Զանգահարել է վերջինիս, խնդրել, որ նա հանդիպի Համլետին, կաշառք առաջարկի՝ սուտ ցուցմունքի դիմաց: Ջանիկը խոստացել է, թե գումարային հարցերն ինքը փառավորապես կլուծի:

Դեկտեմբերի 14-ին, ժամը 11-ն անց 30-ին Անահիտն Արարատ քաղաքում հանդիպել է Համլետին ու փոխանցել Ջանիկի խնդրանքը՝ կաշառքի դիմաց դեկտեմբերի 27-ի դատական նիստի ժամանակ սուտ ցուցմունք տալ, թե Ջանիկի ձեռքին ինքը դանակ չի տեսել, վնասվածքները ստացել է կոտրված ապակիների վրա ընկնելու հետևանքով:

Անահիտը Ջանիկի անունից Համլետին խոստացել է 100 հազար դրամ:

Տուժողի հետ «բանակցությունների» ընթացքում Անահիտը զանգահարել է կալանավայրում գտնվող Ջանիկին, հեռախոսը փոխանցել Համլետին:

Վերջինս փողի դիմաց սուտ ցուցմունք տալու և Ջանիկին օգնելու համաձայնություն է տվել: Անահիտն էլ գրավոր պարտավորագիր է տվել Համլետին` 100 հազար դրամի վերաբերյալ:

Թվում է՝ գործարքի «բարիդրացիական» ընթացքն ապահովված պիտի լիներ, բայց արի ու տես՝ Համլետ Վարդանյանը դատական նիստի ժամանակ խոստումին տեր չի կանգնել ու Ջանիկին իր պաշտպանության տակ չի առել:

Զայրացած Անահիտն էլ 2013 թվականի հունվարի 15-ին ոստիկանությունում սուտ մատնություն է կատարել, թե Համլետը մինչև դատական նիստը հանդիպել է իրեն ու ապահանջել է դատարանում ցուցմունքը փոխելու, սուտ ցուցմունք տալու դիմաց իրեն հարյուր հազար դրամ տալ:

Այս փաստով քրեական գործ է հարուցվել, բայց քննության ընթացքում հաստատվել է, որ Անահիտը սուտ մատնություն է կատարել, հաղորդումն իրականությանը չի համապատասխանում:

Հարուցվել է այլ քրեական գործ՝ արդեն Ջանիկի ու Անահիտի արարքների մասով:

Կալանավայրում կատարվել է Ջանիկի ու Համլետի առերես հարցաքննությունը, որի ժամանակ Ջանիկը, չենթարկվելով, բռունցքով հարվածել է քննիչի՝ ոստիկանության ավագ լեյտենանտ Դավիթ Մարգարյանի դեմքին, պատճառել արյունազեղում ու քերծվածքներ:

Տարաբնույթ հանցավոր արարքների համար Ջանիկ Գուլամիրյանին մեղադրանք է առաջադրվել ՀՀ քրեական օրենսգրքի 316 հոդվածի 1-ին և 340 հոդվածի 1-ին մասերով, իսկ Անահիտ Բեգլարյանին՝ 38-340 հոդվածի 1-ին և 333 հոդվածի 1-ին մասերով:

Ընդհանուր իրավասության դատարանում ամբաստանյալներն իրենց լիովին մեղավոր են ճանաչել:

Ջանիկ Գուլամիրյանը դատապարտվել է 2 տարի 6 ամիս ազատազրկման ու 200 հազար դրամ տուգանքի: Այս պատժին մասնակիորեն գումարվել է Արարատի ու Վայոց Ձորի մարզերի ընդհանուր իրավասության դատարանի 2013 թվականի մարտի 27-ի դատավճռով նշանակված պատիժը, ու Գուլամիրյանի նկատմամբ վերջնական պատիժ է նշանակվել 6 տարի 6 ամիս ազատազրկում և 200 հազար դրամ տուգանք:

Անահիտ Բեգլարյանը վերջին հաշվով դատապարտվել է 250 հազար դրամ տուգանքի: