Իսրայելի իշխանությունները մի շարք պատժիչ միջոցներ են հաստատել Պաղեստինի ղեկավարության դեմ

Իսրայելի իշխանությունները մի շարք պատժիչ միջոցներ են հաստատել Պաղեստինի ղեկավարության դեմ, հայտնել են վարչապետ Բենիամին Նեթանյահուի գրասենյակից, հայտնում է AP-ն։

Ըստ Նեթանյահուի գրասենյակի հայտարարության՝ այս քայլը պատասխան է պաղեստինցիների պնդմանը, որ ՄԱԿ-ի բարձրագույն դատական մարմինն իր կարծիքը տա իսրայելական օկուպացիայի վերաբերյալ:

Ավելի վաղ ՄԱԿ-ի Գլխավոր ասամբլեան կողմ էր քվեարկել մի բանաձեւի, որը Արդարադատության միջազգային դատարանին խնդրում էր միջամտել եւ որոշում կայացնել օկուպացված Արեւմտյան ափին եւ Արեւելյան Երուսաղեմում Իսրայելի քաղաքականության օրինականության վերաբերյալ:

Իսրայելի անվտանգության կաբինետը Պաղեստինի ՄԱԿ-ի խնդրանքը բնութագրել է որպես «Իսրայել պետության դեմ քաղաքական եւ իրավական պատերազմ մղելու որոշում»:

Ի պատասխան՝ Իսրայելի կառավարությունը կսառեցնի Պաղեստինի ինքնավարությունից 39 միլիոն դոլարը եւ փոխարենը կուղղորդի այդ միջոցները «պաղեստինյան զինյալների» հարձակումներից իսրայելցի զոհվածների ընտանիքների փոխհատուցման ծրագրին։

Բացի այդ, Իսրայելը լրացուցիչ կնվազեցնի այն եկամուտը, որը սովորաբար փոխանցում է Պաղեստինին՝ հավասար այն գումարին, որը իշխանությունները անցյալ տարի վճարել են պաղեստինցի բանտարկյալների եւ հակամարտությունում զոհվածների ընտանիքներին, այդ թվում՝ իսրայելցիների դեմ հարձակումներում ներգրավված զինյալներին: Պաղեստինի ղեկավարությունը վճարումները որակում է որպես անհրաժեշտ սոցիալական ապահովություն, մինչդեռ Իսրայելն ասում է, որ այսպես կոչված Նահատակների հիմնադրամը խրախուսում է բռնությունը: Իսրայելի կողմից պահվող միջոցները սպառնում են սրել պաղեստինյան ֆինանսական խնդիրները:

Իսրայելի անվտանգության կաբինետը նաեւ ուղղակիորեն թիրախավորել է պաղեստինցի պաշտոնյաներին, ասելով, որ կմերժի «Իսրայելի դեմ քաղաքական եւ իրավական պատերազմ մղող VIP-անձերին» արտոնություններից: ԽՎ-ի բարձրաստիճան պաշտոնյաները ստանում են իսրայելական թույլտվություններ, որոնք թույլ են տալիս մտնել եւ դուրս գալ գրավյալ Արեւմտյան ափ՝ ի տարբերություն սովորական պաղեստինցիների:

Մյուս միջոցառումները ուղղված են եղել Արեւմտյան ափին, որը Իսրայելը գրավել էր 1967 թվականի Մերձավոր Արեւելքի պատերազմի ժամանակ:

Ավելի քան մեկ տարի առաջ Իսրայելը պաղեստինցի վեց խոշոր իրավապաշտպանների ճանաչել էր ահաբեկչական կազմակերպություններ, իսկ անցած ամառ ներխուժել եւ փակել էր նրանց գրասենյակները: Պաղեստինյան խմբերը հերքել են մեղադրանքները, եւ այդ քայլը լայն միջազգային դատապարտման է արժանացել: