Ո՞ր հիվանդություններն են սրվում գարնանը

Գարունը բնության զարթոնքի ժամանակաշրջանն է, բայց նաև՝ որոշ հիվանդությունների սրման սեզոնը, ուստի պետք է պատրաստ լինել հնարավոր բարդություններին՝ առաջին իսկ ախտանշանների դեպքում անհրաժեշտ կանխարգելիչ քայլեր իրականացնելու համար։

Գարնանը վախով են սպասում հատկապես ալերգիկները, բայց ալերգիայից բացի, կան այլ հիվանդություններ ևս, որոնք սեզոնային սրացմամբ են արտահայտվում։

Իմունոլոգները այդպիսի 9 հիվանդություն են առանձնացնում

Սեզոնային ալերգիա

Գարնանը քամու միջոցով փոշոտվող ծառերի, բույսերի, թփերի ու ծաղիկների ծաղկափոշին, հայտնվելով օդում, իսկական խնդիր է դառնում սեզոնային ալերգիայով տառապողների համար։ Գարնանային ալերգիայի դեմ պայքարի հիմնականում միջոցը մնում են հատուկ դեղամիջոցները, իսկ ալերգիայի սիմպտոմները հիմնականում հետևյալն են․ այտուցվածություն, առատ քթարտադրություն, աչքերի կարմրություն, արցունքաբերություն, այրոցի զգացում, քոր, շնչահեղձություն։

Ասթմա

Գարնանը սրվում է նաև ասթման․ օդի ջերմաստիճանի և խոնավության տատանումներին զուգահեռ՝ մեծ դեր են խաղում նաև ասթման խթանող արտաքին գործոնները․ հատկապես գյուղական վայրերում՝ գարնանային գյուղատնտեսական աշխատանքների ժամանակ օգտագործվող պարարտանյութերը, այգիներում միջատների դեմ պայքարի համար օգտագործվող քիմիկատները վտանգավոր են ասթմայով հիվանդների համար։ Գարնանը ասթմայի նոպաները կարող են ավելի հաճախակի դառնալ, ուստի բժշկի վերահսկողության տակ գտնվելն անհրաժեշտ նախապայման է։

Ռինովիրուս և սուր շնչառական վիրուսային վարակներ

Գարունը համարվում է ռինովիրուսի և սուր շնչառական վիրուսային վարակների պիկի սեզոնը, ուստի անհրաժեշտ է հատկապես հանրային վայրերում պահպանել հիգիենայի կանոնները․ որքան հնարավոր է՝ հաճախ լվացվել օճառով, տարբեր իրերի և առարկաների դիպչելուց հետո՝ ձեռքերը չտանել բերանին, քթին, չտրորել աչքերը, խուսափել հիվանդ մարդկանց հետ շփումից՝ չվարակվելու համար։

Հարբուխ

Գրիպի ինֆեկցիայի համար բարենապաստ է խոնավ միջավայրը, ուստի անձրևաշատ գարնանը պետք է ձեռնարկել նախազգուշական բոլոր միջոցառումները՝ հարբուխով չհիվանդանալու՝ վիրուսը չկլանելու կամ չտարածելու համար։ Այս դեպքում ևս հիգիենայի տարրական կանոնները պահպանելը առաջին ու ամենակարևոր կանխարգելիչ քայլն է։

Լայմի հիվանդություն

Լայմի հիվանդությունը, որը հայտնի է նաև որպես Լայմի բորելիոզ, վարակիչ հիվանդություն է, որը հարուցվում է բորելիա բակտերիայով, իսկ այն տարածվում է տզերի միջոցով։ Դրանք բազմանում են 10աստիճանից բարձր ջերմաստիճանում, ուստի գարնանը խորհուրդ է տրվում զգուշություն պահպանել բուսականությամբ խիտ ու հարուստ տարածքներում գտնվելիս։ Հիվանդության ախտանշաններն են ցանն ու դողէրոցքը։

Գաստրոէնտերիտ

Էնտերովիուսները ևս տաք եղանակին ակտիվանալու հակում ունեն։ Ախտանշաններն են՝ փորացավը, փորլուծությունը, սրտխառնոցը, որոնք 1-2 օր են տևում։ Էնտերովիրուսների կանխարգելման առաջին նախապայմանը ևս հիգիենայի տարրական կանոնները պահպանելն, ինչպես նաև գարնանային սննդակարգը վիտամիններով ու սննդարար նյութերով հագեցնելն է։

Ստրեպտոկոկային ֆարինգիտ

Կոկորդի հետին պատի ինֆեկցիոն ախտահարումն է, որն ընդգրկում է նաև նշագեղձերը։ Հաճախ հանդիպող ախտանիշներն են՝ տենդը, կոկորդի ցավը, կարմրած նշագեղձերը և մեծացած պարանոցային ավշային հանգույցները։

Ալերգիկ կոնյուկտիվիտ

Կոնյուկտիվիտն ակնագնդերի և կոպերի լորձաթաղանթի՝ շաղկապենու բորբոքումն է, որն առաջացանում է աչքերի կարմրություն: Այն կարող է լինել վարակիչ բնույթի, ուստի շատ կարևոր է ախտորոշել բորբոքման ճիշտ պատճառը, որը թույլ կտա նշանակել արդյունավետ բուժում։

Միջատների խայթոցից առաջացած ալերգիա

Միջատների խայթոցի դեպքում պետք է լվանալ խայթոցի շրջանը ջրով և օճառով։ Եթե մարդը գերզգայուն է միջատի խայթոցի նկատմամբ, ապա անհրաժեշտ է հնարավորինս անշարժացնել վնասված մասը և տուժա­ծին տեղափոխել մոտակա բուժհաստատություն։ Եթե խայթոցը պարանոցի կամ բերանի շրջանում է, ապա տուժածին պետք է կում-կում մեծ քանակությամբ սառը ջուր խմեցնել՝ վերին շնչուղիների այտուցը կանխելու նպատակով, փոխանցում է Aysor.am-ը։