Սպիտակ տունը նախատեսում է ամերիկացիների զանգվածային տարհանում Մերձավոր Արևելքից

Սպիտակ տունը «խելամիտ արտակարգ պլանավորում» է իրականացնում՝ ամերիկացիներին Մերձավոր Արևելքից տարհանելու համար, եթե Իսրայելի և ՀԱՄԱՍ-ի միջև պատերազմը վերաճի ավելի լայն տարածաշրջանային հակամարտության, հայտնում է AP-ն։

Սպիտակ տան Ազգային անվտանգության խորհրդի խոսնակ Ջոն Քիրբին ընդգծել է, որ ներկայումս «ակտիվ ջանքեր» չկան ամերիկացիներին տարածաշրջանից տարհանելու համար, բացառությամբ չարտերային թռիչքների, որոնք ԱՄՆ կառավարությունը սկսել է այս ամսվա սկզբին Իսրայելից: «Դա անխոհեմ և անպատասխանատու կլիներ, եթե մենք չունենայինք մարդկանց, որոնք կմտածեին անկանխատեսելի հանգամանքների եւ հնարավորությունների լայն շրջանակի մասին», - ասել է Քիրբին՝ հավելելով. «Եվ, իհարկե, տարհանումն այդ բաներից մեկն է»:

Սպիտակ տունը վերանայել է արտակարգ իրավիճակների պլանները՝ Իսրայելի և ՀԱՄԱՍ-ի միջև պատերազմն ավելի սրվելու մտավախությունների ֆոնին: ԱՄՆ-ն Իսրայելին ասել է, որ Գազա հնարավոր ցամաքային ներխուժման հետաձգումը կարող է օգտակար լինել, քանի որ ԱՄՆ-ն և տարածաշրջանի մյուս գործընկերները փորձում են ապահովել հոկտեմբերի 7-ի հարձակման ժամանակ ավելի քան 200 պատանդների ազատ արձակումը:

Պենտագոնի խոսնակ, բրիգադային գեներալ Փեթ Ռայդերը հայտարարել է, որ ԱՄՆ-ն պատրաստվում է բռնության աճի` նշելով, որ արդեն առնվազն 13 հարձակում է եղել Իրաքում և Սիրիայում ամերիկյան զորքերի և օբյեկտների վրա: «Այն, ինչ մենք տեսնում ենք, ԱՄՆ ուժերի և անձնակազմի դեմ գործողությունների ավելի զգալի էսկալացիայի հեռանկարն է մոտ ապագայում ողջ տարածաշրջանում Իրանի մաիոնետային ուժերի և, ի վերջո, Իրանի կողմից», - ասել է Ռայդերը: Նա հավելել է, որ ԱՄՆ-ն չի վարանի միջոցներ ձեռնարկել տարածաշրջանում իր ուժերն ու շահերը պաշտպանելու համար։

«Սա պատերազմ է. Սա կռիվ է։ Դա արյունոտ է, տգեղ և խառնաշփոթ է լինելու», - ասել է Քիրբին: «Ես կցանկանայի, որ կարողանայի ձեզ այլ բան ասել: Ես կցանկանայի, որ դա տեղի չունենա»:

Ռայդերը նշել է, որ ձեռնարկվում են ուժային պաշտպանության մի շարք նոր միջոցներ, այդ թվում՝ հակաօդային պաշտպանության համակարգերի կիրառումը: Նրա խոսքով՝ Մերձավոր Արևելքում սկսել են տեղակայվել THAAD համակարգեր և Patriot հրթիռային հավելյալ գումարտակներ։

Ռայդերը նաև ասել է, որ լրացուցիչ ուժեր են տեղակայվել Մերձավոր Արևելք։ Նյու Ջերսիի ավիացիոն ազգային գվարդիայի 119-րդ էքսպեդիցիոն կործանիչները F-16 կործանիչներով ժամանել են երեքշաբթի, ասել է նա, սակայն պաշտոնյաները չեն ասել, թե կոնկրետ ուր են դրանք ուղղվում:

Աղբյուրը