Ռեցեսիան Գերմանիայում ավելի սուր կլինի, քան սպասվում էր. Ifo

Գերմանիայի ՀՆԱ-ն ավելի շատ է կրճատվել, քան սպասվում էր այս տարի ավելի վաղ, քանի որ բարձր գնաճը բացասաբար է ազդել մասնավոր սպառման վրա, չորեքշաբթի նշել է Ifo ինստիտուտը՝ ներկայացնելով իր կանխատեսումները, տեղեկացրել է Reuters-ը։

«Գերմանական տնտեսությունը շատ դանդաղ է դուրս գալիս ռեցեսիայից»,- ասել է Ifo-ի տնտեսական կանխատեսումների բաժնի ղեկավար Թիմո Վոլմերսհաուզերը։

Սպասվում է, որ Գերմանիայի համախառն ներքին արդյունքն այս տարի կնվազի 0,4 տոկոսով, ինչը 0,1 տոկոսով ավելին է, քան Ifo ինստիտուտի կանխատեսումը մարտին։

«Երբ մենք համեմատում ենք Գերմանիան մեր հիմնական առեւտրային գործընկերների հետ, այդ երկրներում, համենայն դեպս, աճ սպասվում է»,- ասել է Վոլմերսհաուզերը։

Ifo-ն կանխատեսում է, որ եվրոգոտու ՀՆԱ-ն այս տարի կավելանա 0,6, իսկ ԱՄՆ-ինը՝ 0,9 տոկոսով։

Տնտեսական ինստիտուտը նաեւ իջեցրել է Գերմանիայի 2024թ. ՀՆԱ աճը՝ 1,5 տոկոս ավելի վաղ սպասվող 1,7 տոկոսի փոխարեն։

Գնաճը, ըստ կանխատեսումների, դանդաղ կիջնի՝ 2022թ. 6,9-ից այս տարի հասնելով 5,8 տոկոսի (2024-ին կնվազի՝ հասնելով 2,1 տոկոսի)։ Ինչ վերաբերում է բազային գնաճին, Ifo ինստիտուտը կանխատեսում է, որ այն այս տարի կավելանա՝ հասնելով 6 տոկոսի նախորդ տարվա 4,9 տոկոսի դիմաց, 2024-ին կնվազի՝ հասնելով 3 տոկոսի։

Գնաճի պատճառով մասնավոր սպառումը այս տարի կնվազի 1,7 տոկոսով։ Այն նորից չի ավելանա մինչեւ 2024թ., երբ սպասվում է ավելացում 2,2 տոկոսով։

Գործազուրկների թիվը 2023-ին մի փոքր կավելանա, բայց գործազրկության մակարդակը կմնա անփոփոխ նախորդ տարվա համեմատ եւ կկազմի 5,3 տոկոս՝ 2024թ. ավելանալով եւ հասնելով 5,5 տոկոսի։

Ifo-ի գնահատականներով՝ նոր պետական փոխառությունների ծավալը կկրճատվի՝ 2022թ. 106 մլրդ եվրոյից այս տարի հասնելով 69 մլրդ-ի եւ 27 մլրդ-ի հաջորդ տարի։