Կենսաչափական սարքերում, որոնք վաճառվել են eBay-ում, ԱՄՆ-ի ռազմական գաղտնի տվյալներ են հայտնաբերվել

Գերմանացի հետազոտողները, որոնք eBay-ից գնել են կենսաչափական տվյալների հավաքման սարքեր, դրանց հիշողության քարտերում ԱՄՆ-ի ռազմական գաղտնի տվյալներ են հայտնաբերել, հայտնում է The New York Times-ը։ Դրանք ներառել են մատնահետքեր, ծիածանաթաղանթի սքանավորում, լուսանկարներ, անուններ եւ մարդկանց նկարագրություններ, հիմնականում Իրաքից եւ Աֆղանստանից: Հրատարակության տվյալներով՝ նրանցից շատերն աշխատել են ԱՄՆ բանակի հետ եւ կարող են թիրախ դառնալ, եթե սարքը հայտնվեն սխալ ձեռքերում։

Հետազոտողների Chaos Computer Club խումբը՝ Մաթիաս Մարքսի գլխավորությամբ, eBay-ից գնել է վեց սարք, որոնց մեծ մասի գինը 200 դոլարից ցածր է եղել:

Նրանք «ցնցվել» են արդյունքներից։ Մի սարքի հիշողության քարտի վրա նրանք գտել են 2632 մարդու անուններ, ազգություններ, լուսանկարներ, մատնահետքեր եւ ծիածանաթաղանթի սքանավորում։ Այլ մետատվյալները ցույց են տվել, որ այն օգտագործվել է Աֆղանստանի Քանդահարի մոտակայքում 2012 թվականի ամռանը: Մեկ այլ սարք օգտագործվել է Հորդանանում 2013 թվականին եւ պարունակել է ԱՄՆ զինվորականների ոչ մեծ խմբի մատնահետքեր եւ աչքի ծիածանաթաղանթի սքանավորում:

Համաձայն այս սարքերի վերաբերյալ 2011 թվականի ուղեցույցի՝ նման սարքերն օգտագործվել են ապստամբներին նույնականացնելու, տեղի բնակիչների եւ երրորդ երկրների քաղաքացիների մուտքը ԱՄՆ բազաներ ստուգելու համար:

Մի սարքը գնվել է ռազմական աճուրդից, եւ վաճառողն ասել է, թե չի իմացել, որ այն պարունակում է գաղտնի տվյալներ: Գաղտնի տեղեկատվությունը պահվել է հիշողության քարտի վրա, ուստի ԱՄՆ զինվորականները կարող էին վերացնել ռիսկը՝ պարզապես հեռացնելով կամ ոչնչացնելով քարտերը՝ նախքան դրանք վաճառելը: