Զարմանալի պարադոքս Հայաստանում բնակարանների եւ սեփական տների վարձակալության մասին պաշտոնական թվերում
Ինչպես հայտնի է, Ուկրաինայում ռազմական գործողություններից հետո Հայաստան տասնյակ հազարավոր օտարերկրացիներ են ժամանել, հիմնականում՝ ՌԴ քաղաքացիներ։ Նրանցից շատերը ՏՏ ոլորտի ներկայացուցիչներ են, ովքեր այստեղ շարունակում են (եւ, ըստ երեւույթին, դեռ երկար կշարունակեն) իրենց աշխատանքն արտասահմանյան ընկերությունների հետ։ Բայց, իհարկե, եկվորներն առաջին հերթին սկսել են զբաղվել ոչ թե աշխատանքով, այլ բնակարանային հարցով։
Փողի հոտ զգալով՝ իրենց բնակարանները վարձակալությամբ տրամադրելու հնարավորություն ունեցող քաղաքացիներն անմիջապես բարձրացրեցին վարձավճարները։ Ըստ տեղեկությունների՝ նույնիսկ եղել են դեպքեր, երբ «հին» վարձակալներին, ովքեր չեն համաձայնել վարձավճարի կտրուկ բարձրացմանը, սեփականատերերը բառացիորեն փողոց են նետել։ Այդ այլանդակությունները թողնելով նրանց խղճին՝ հետաքրքրվենք, թե ինչպես է հազարավոր այցելուների հոսքն ազդել բնակարանների վարձակալության պաշտոնական ցուցանիշների վրա։
Թվում է, թե մարտ ամսվա վարձավճարների ցուցանիշները պետք է փետրվարի համեմատ բազմապատիկ ավելանային։ Բայց, դատելով պաշտոնական թվերից, այս ոլորտում ոչ մի արտառոց բան տեղի չի ունեցել։ Այդպես, եթե փետրվարին Հայաստանում վարձակալվել էր 141 բնակարան, ապա մարտին՝ ընդամենը մի փոքր ավել՝ 173 բնակարան։ Ճիշտ նույն պատկերը սեփական տների վարձակալության դեպքում է՝ 60-ից 78 միավոր։ Բնակարանները ռետինից չեն, այնպես որ՝ որտե՞ղ են հիմա ապրում տասնյակ հազարավոր օտարերկրացիները: Բոլորը հյուրանոցներո՞ւմ են տեղավորվել։ Որտեղի՞ց առաջացավ բնակարանների վարձակալության հետ կապված աժիոտաժը:
Ինչպես կարելի է ենթադրել, պատճառն այն է, որ շատ սեփականատերեր իրենց բնակարանը վարձով տրամադրելու պայմանագիր չեն կնքում։ Չէ որ այդ դեպքում նրանք ստիպված կլինեն վարձավճարի 10 տոկոսի չափով հարկ վճարել։ Իսկ դա մեծ գումար է: Չէ՞ որ մայրաքաղաքի էլիտար թաղամասերում բնակարանների վարձավճարն ամսական 1500 դոլարի է հասնում եւ նույնիսկ՝ ավելի բարձր։ Թե ինչպիսին են բնակարանների «ստվերային» վարձավճարի մասշտաբները, կարելի է միայն ենթադրել։ Չէ որ պետական վերահսկողություն այս ոլորտում, հասկանալի պատճառներով, դժվար է իրականացնել։
Հավելենք, որ մարտին օտարերկրյա քաղաքացիները Հայաստանում 64 բնակարան են գնել՝ փետրվարի 40 բնակարանի համեմատ։ Սեփական տների գծով ընդհանրապես աճ չի գրանցվել, մարտի ցուցանիշը մնացել է փետրվարի մակարդակին, երբ 21 տուն էր վաճառվել։ Այդպես, Ռուսաստանից վերոնշյալ այցելուների կողմից Հայաստանում բնակարանների զանգվածային գնման մասին ենթադրությունները դեռ հիմքեր չունեն։