«Զարմանալի է, որ սուրի փոխարեն մուրճ չէ». Հակակոռուպցիոն կոմիտեի խորհրդանշանը՝ քննարկումներ առարկա

Արդարադատության նախարարությունը հանրային քննարկման է ներկայացրել վերջերս ստեղծված Հակակոռուպցիոն կոմիտեի խորհրդանիշն ու նկարագիրը սահմանելու մասին նախագիծը։

Նախագծում նշվում է, որ Հակակոռուպցիոն կոմիտեի խորհրդանիշի տարրերն են` առյուծը, սուրը, Հայաստանի Հանրապետության դրոշը և գանձարկղը։

Այն ոչ միանշանակ ընդունվեց հանրության կողմից, շատերը այն համեմատեցին մուլտիպլիկատիվ արտադրանքի և անլրջության հետ։

Արևմտահայոց հարցերի ուսումնասիրման կենտրոնի տնօրեն, նշանագետ Հայկազուն Ալվրցյանը ArmDaily.am-ի հետ զրույցում մեկնաբանելով խորհրդանիշը ասաց, որ զարմանալի է, որ սուրի փոխարեն մուրճ չէ։

«ՀՀ խորհրդանիշ եռագույնն է, սնդուկն է՝ գանձարանը, բյուջեն, որը պետության՝ առյուծի կողմից վերահսկվում է։ Հումորային մեկնաբանմամբ կարելի է ենթադրել, որ ասում են՝ թալանողի վիզը կկտրենք սպառնագին այդ սուրով։ Ինչ ենք տեսնում՝ բյուջեի պահապանը մենք են, սրով պաշտպանում ենք, բայց չենք հասկանում՝ ումից են պաշտպանում, ինչու է սուր ձեռքին։ Սուրը, ի վերջո, մահվան, պատերազմի սիմվոլ է։ Այսկերպ ի՞նչ են ուզում ասել, որ պատերազմ և մահ են հռչակե՞լ կոռուպցիայի դեմ պայքարում։ Շատ խորը իմաստ փնտրել պետք չէ, այն շատ պարզունակ է։ Առյուծն էլ, տվյալ դեպքում, ուժի խորհրդանիշ է, բայց տարբեր համատեքստերում այն տարբեր կերպ է մեկնաբանվում։ Առյուծը նաև Քրիստոսի խորհրդանիշն է։ Պետությունը իրեն առյուծի տեղ է դրել, և պետական ուժը պաշտպանում է պետական բյուջեն»,- ասաց նշանագետը։

Ինչ վերաբերում է գույների համադրությանը՝ Ալվրցյանը նշեց, որ դա շատ անլուրջ է։

«Անլուրջ է այնքանով, որ չի կարելի մածուն նկարել և գրել որ այն սպիտակ է. ակնհայտ է և օրենքներով սահմանված է, որ պետությունը պաշտպանում է բյուջեն, պետությունը արդար է և բյուջեն թալանողին պետք է պատժի, օրենքներ սահմանի։ Ամբողջ զավեշտը սրանում է, դրա համար նշեցի, որ լավ է՝ մուրճ չեն նկարել սուրի փոխարեն։ Այսինքն՝ նման խորհրդանշանները ավելի շատ ծածկում են, պատրանք են ստեղծում, քան բուն էությունն են ցույց տալիս։ Եթե իրենք ճիշտ կարողանային իրենց գործառույթը կատարել՝ նման անհեթեթ խորհրդանշանների կարիք չէին ունենա»,- ասաց նշանագետը։

ArmDaily.am-ի հետ զրույցում նախկին դատախազ, ներկայում փաստաբան Րաֆֆի Ասլանյանն էլ անդրադառնալով այս խորհրդանշանին ասաց, որ եթե դրա ստեղծումը վստահեին նորմալ արվեստագետների՝ նման խնդրի առաջ չէին կանգնի։

«Հավանաբար փորձել են իրենց միջոցներով համակարգչից քաշեն, մի բան ստեղծեն։ Ժամանակին նման հարցերով դիմել են արվեստի վաստակավոր գործիչների, նկարիչների։ Իրենք են այդպիսի ստեղծագործություններն անում։ Հիմա ժամանակները փոխվել են և մարդկանց թվում է, որ եթե իրենք իրավաբան են՝ կարող ենք նաև գեղանկարչությամբ էլ զբաղվել կամ ինչ-որ պատկերներով։ Ցանկացածի համար ակնհայտ է, որ այն չի արտացոլում Հակակոռուպցիոն կոմիտեի լիազորությունները և ոչ էլ առհասարակա գեղարվեստական արժեք է ներկայացնում։ Սա չափազանց մուլտիպլիկատիվ մի տարբերանշան է, որը նույնիսկ ծիծաղելի է»,- ասաց Ասլանյանը։