2-րդ խմբի հաշմանդամ խորթ մորը սպանելու մեջ մեղադրվող երիտասարդը դատապարտվեց 12 տարվա ազատազրկման
Շիրակի մարզի Լուսաղբյուր համայնքում անցած տարվա սեպտեմբերին խորթ մորը սպանելու մեջ մեղադրվող 31-ամյա Հովհաննես Չեռնոմորյանը դատապարտվեց 12 տարվա ազատազրկման: Նման դատավճիռ է կայացրել Շիրակի մարզի ընդհանուր իրավասության դատարանը:
31-ամյա տղամարդը մեղսունակ էր ճանաչվել եւ ընդունել էր իրեն առաջադրված մեղադրանքը:
Ըստ մեղադրական եզրակացության՝ Հովհաննեսը 2016թ. սեպտեմբերի 2-ին մինչև սեպտեմբերի 3-ն ընկած ժամանակահատվածում, գտնվելով ալկոհոլի ազդեցության տակ, շիզոֆրենիա, պարանոիդ ձև, ցնորազառանցանքային համախտանիշներով տառապող, 2-րդ խմբի հաշմանդամ խորթ մոր կողմից տնից դուրս գալու և հեռանալու ցանկություն հայտնելուց հետո, տան բակում, ապա նաեւ հյուրասենյակում ձեռքերով, ոտքերով, փայտով բազմաթիվ հարվածներ է հասցրել նրա մարմնի տարբեր մասերին` սպանելով նրան: