Ըստ գիտնականների՝ միգրենն այլևս խնդիր չէ

Բրիտանացի գիտնականները ստեղծել են շարժական մագնիսական խթանման սարք, որն արդյունավետ պայքարում է սաստիկ գլխացավերի դեպքում (միգրեն):

Այդ սարքը, որը կոճակը սեղմելիս մագնիսական ազդակներ է ուղարկում ուղեղին' գլխացավի հետ պայքարելու նպատակով, խորհուրդ է տրվել օգտագործել որպես բուժման եղանակ Մեծ Բրիտանիայի Առողջապահական Ազգային Ինստիտուտի կողմից, գրում է Medical News Today պարբերականը:

Միգրենը սաստիկ գլխացավ է, որը հաճախ ուղեկցվում է լուսավախությամբ և սրտխառնոցով, ինչպես նաև տեսողական խանգարումներով' կույր կետեր, նեղացած տեսողություն, և նույնիսկ ժամանակավոր կուրություն: Որոշ հիվանդներ նշում են նաև թմրածություն, գլխապտույտ, թուլություն:

Այս վիճակի պատճառները թերևս հայտնի չեն, սակայն խթան կարող են հանդիսանալ շրջակա միջավայրը, սթրեսները, ալկոհոլը, սննդի և քնի պակասը կամ հորմոնալ փոփոխությունները:

Սովորաբար միգրենը դեղամիջոցներով են բուժում, սակայն նոր շարժական սարքի կլինիկական փորձարկումները ցույց տվեցին վերջինիս արդյունավետությունը, և նրա ստեղծողները ասում են, որ այն կարող է "փոխել միգրենով տառապողների կյանքը":

Մի հետազոտության ընթացքում, որին մասնակցել է 164 հիվանդ, 39% դեպքերում սարքն արդյունավետ է եղել երկու ժամվա ընթացքում, 28% ազատվել են ցավից մեկ օրվա ընթացքում, իսկ 27% չունեին ոչ մի ախտանիշ 48 ժամ անց:

Մեկ այլ հետազոտության ժամանակ սարքը օգտագործող հիվանդների 75% նշել են գլխացավերի հաճախականության նվազեցում:

Գիտնականները նշում են, որ սարքը կարող է օգտակար լինել այն հիվանդների համար, որոնց չեն օգնում ներկայիս բուժման եղանակները' ցավազրկողներ, հակաբորբոքային դեղամիջոցներ և այլն:

"Սա մի բեկումնային բուժման եղանակ է այն մարդկանց համար, ովքեր չեն հանդուրժում կամ չեն հակազդում ժամանակակից բուժման եղանակներին, և մի դուռ է բացում միգրենային գլխացավերի բուժման նոր դարաշրջանի համար", - ասել է բժիշկ-նյարդաբան Ֆայազ Ահմեդը: