Կոմիտասի շուկայի վաճառողները անելանելի վիճակում են, ստիպում են ազատել տարածքը

Մարտի 8-ի նախօրեին Կոմիտասի շուկայի վաճառողներին «անակնկալ» են արել` հայտնելով, որ պետք է ազատեն շուկայի տարածքը։ Աշխատողներն անելանելի վիճակում են հայտնվել, չգիտեն` ինչ անել, ուր գնալ։

«Եկան, ասեցին` վատ լուր. մինչև մարտի 15-ը պետք է ազատեք տարածքը։ Բոլորը խառնվեցին իրար, նոր ասացին` մի 25 օր ժամանակ ենք տալիս, ձեր ապրանքի ու ձեզ համար տեղ գտեք», -«Սպուտնիկ Արմենիա»-ին ասել է շուկայի վաճառողուհիներից մեկը։

Վաճառողները պահանջ-խնդրանք ունեն` մինչև տարվա վերջ ժամանակը երկարացնեն։ Ասում են` ցրտին կանգնել, սառել են, հիմա ցանկանում են գոնե սեզոնային մրգերն ու բանջարեղենը կարողալ վաճառել։

Նրանք շուկայում օրվա վճար են տալիս` 2000-3000 դրամ։ Սա այնքանով է ձեռնտու, որ հարկային դաշտի հետ կապ չունեն, իսկ խանութներում վաճառելու համար պետք է և՛ խանութին վարձավճար տան, և՛ ՊԵԿ-ին։

«էդ քանի՞ տոկոս օգուտ ունենք, որ 5 տոկոս տանք հարկայինին, 10 տոկոս տանք խանութի վարձ։ Մեզ աշխատացնում են «ռաբի» պես, ամբողջը տանք սրան- նրան։ Ո՞նց անենք, որտե՞ղ ծախենք»,-դժգոհել է մեկ այլ աշխատակից։

Կոմիտասի շուկայում շատերն իրենց ապրանքը վաճառում են արդեն 30-40 տարի, տարածքին սովորել են, ունեն իրենց մշտական հաճախորդները։ Փորձել են տնօրենությունից հասկանալ` ինչ է լինելու շուկայի ճակատագիրը, նույնիսկ առաջարկել են` եթե վերանորոգվելու և կրկին շուկա է դառնալու, պատրաստ են ավելի շատ վճարել հետագայում, միայն թե շարունակեն իրենց գործը։ Սակայն նրանց այս պահի դրությամբ ոչինչ հայտնի չէ։

«Ապրելակերպ չունենք, սա էլ բռնեցին, փակեցին, ո՞նց ենք անելու, ո՞նց պետք ա ապրենք։ Դրա հետ միասին ասում են` տրանսպորտը կթանկացնեն, ոնց որ սաղ-սաղ թաղեն»,– հավելել է տարեց վաճառողներից մեկը։

Կոմիտասի շուկայում շուրջ 70 վաճառող կա. նրանց մի մասը գյուղից են բերում իրենց ապրանքը և վաճառում, մի մասն էլ վերավաճառողներ են։

Լրատվամիջոցը փորձել է կապ հաստատել նաև շուկայի տնօրենության հետ, սակայն զանգերն անպատասխան են մնացել։

«Սպուտնիկ Արմենիա»-ի տեղեկություններով` Կոմիտասի շուկան գնել է «GTB Holding»-ը, որը նաև կառուցում է Արարատի մարզի մետաղագործական գործարանը։