Արգենտինայում տղամարդը գնացել է վիրահատելու լեղապարկը՝ փոխարենը բժիշկները նրան սխալմամբ վազէկտոմիայի են ենթարկել

Արգենտինացի տղամարդն իր կյանքի շոկն է ստացել` տեղեկանալով, որ բժիշկները լեղապարկը վիրահատելու փոխարեն վազէկտոմիա (վիրահատական միջամտություն, որի ընթացքում տղամարդու սերմնածորանները հատվում ու կապվում (փակվում) են այնպես, որ սերմնահեղուկը չկարողանա անցնել սերմնատար ծորաններ (սերմնաժայթքում) և կանխվի բեղմնավորումը-Խմբ.) են կատարել, Tert.am-ի փոխանցմամբ՝ գրում է odditycentral.com-ը:

41-ամյա Խորխե Բասետոն գնացել է Արգենտինայի Կորդոբա նահանգի Ֆլորենսիո Դիաս նահանգային հիվանդանոց՝ լեղապարկի վիրահատության համար։ Վիրահատությունը նախատեսված էր փետրվարի 28-ին, սակայն որոշ հանգամանքների պատճառով Խորխեի վիրահատությունը տեղափոխվել է։

Վիրահատության օրը հիվանդանոցի անձնակազմը մտել է հիվանդի սենյակ, պառկեցրել նրան պատգարակի վրա և առանց որևէ բան հարցնելու կամ նույնիսկ բժշկական քարտը ստուգելու՝ նրան տարել վիրահատարան։ Բժիշկները ևս չեն ստուգել բժշկական քարտը և ուղղակի կատարել են վիրահատության այն տեսակը, որը նախատեսված էր այդ օրվա համար՝ վազէկտոմիա:

Երբ Խորխեն արթնացել է վիրահատությունից, չի պատկերացրել, թե ինչ է տեղի ունեցել: Հետո բժիշկը ներս Է մտել նրան ստուգելու: Բժշկական քարտը նայելուց հետո բժիշկը տղամարդուն շոկային լուր է հայտնել. նախատեսված լեղապարկի վիրահատության փոխարեն վազէկտոմիա է կատարվել։

Արգենտինացին խուճապի է մատնվել, բայց մտածելու շատ ժամանակ չուներ, քանի որ շուտով տարել են լեղապարկի վիրահատության։

Երկրորդ վիրահատությունից հետո Խորխե Բասետոն ցանկացել է իմանալ, թե ինչպես է տեղի ունեցել սխալը և ինչ կարելի է անել՝ վազէկտոմիայի արդյունքը չեզոքացնելու համար: Բժիշկներն անընդհատ իրար են մեղադրել կոպիտ սխալի համար:

Տղամարդու փաստաբանը լրագրողներին ասել է, որ սխալը ծագել է իր հաճախորդի լեղապարկի վիրահատման օրը չորեքշաբթի տեղափոխելու հետևանքով: Վազէկտոմիաները սովորաբար կատարվում են չորեքշաբթի օրերին, և Ֆլորենսիո Դիասի նահանգային հիվանդանոցի անձնակազմը, ներառյալ բժիշկները, Խորխե Բաստոյին ընդունել են որպես վազէկտոմիայի համար եկած մեկ այլ հիվանդի՝ զլանալով կարդալ նրա բժշկական քարտը: