Սեպտեմբերի 19-ից առ այս պահը Նիկոլ Փաշինյանը ուղիղ հեռախոսակապ չի հաստատել Արցախի Հանրապետության նախագահի հետ

Ադրբեջանի կողմից սեպտեմբերի 19-ին Արցախի նկատմամբ լայնածավալ պատերազմական գործողությունների վերսկսումից հետո՝ ՀՀ վարչապետ Նիկոլ Փաշինյանը ուղիղ հեռախոսակապ չի հաստատել Արցախի Հանրապետության նախագահ Սամվել Շահրամանյանի հետ։

Տեղեկությունը ճշտելու համար «Փաստինֆո»-ն կապ է հաստատել վարչապետի մամլո խոսնակ Նազելի Բաղդասարյանի հետ, ով նշեց, որ Նիկոլ Փաշինյանը պարբերաբար իր ելույթներում նշում է, որ ՀՀ կառավարության անդամները կապի մեջ են ԼՂ իրենց գործընկերների հետ։

«Նա մասնավորապես նշել է. «Մենք մշտական կապի մեջ ենք Լեռնային Ղարաբաղի գործընկերների հետ և այսօր առավոտյան ունեցած քննարկումների արդյունքում կարող ենք այնուամենայնիվ արձանագրել, որ իրադրության դրական տեղաշարժի որոշակի հույսեր կան: Դա Լեռնային Ղարաբաղի մեր մի շարք գործընկերների գնահատականն է, որը մենք նաև, ինչ-որ առումով, կիսում ենք»։ Խմդրում եմ հիմք ընդունել այս հայտարարությունը»,-ասաց Բաղդասարյանը։

Մեր ուղիղ հարցին, թե խոսքը երկրի ղեկավարների միջև ուղիղ հեռախոսակապի, հաղորդակցության մասին է, հետեւապես կարող ենք արձանագրել, որ Փաշինյանն անձամբ չի խոսել Շահրամանյանի հետ՝ Բաղդասարյանն առաջարկեց գրավոր հարցում ուղարկել։