Եվրախորհրդարանում ԵՄ-ին կոչ են արել վերանայել Ադրբեջանի հետ հարաբերություններն ու դիտարկել պատժամիջոցներ կիրառելու հարցը

Եվրախորհրդարանի արտաքին հարաբերությունների հանձնախմբի նախագահ Դեյվիդ Մաքալիստերը, Հարավային Կովկասի պատվիրակության ղեկավար Մարինա Կալյուրանդը, Հայաստանի եւ Ադրբեջանի հարցերով զեկուցողներ Անդրեյ Կովաչեւը եւ Ժելյանա Զովկոն համատեղ հայտարարությամբ են հանդես եկել եւ շեշտել, որ Լեռնային Ղարաբաղի դեմ Ադրբեջանի լայնածավալ ռազմական ագրեսիան ոչ մի պարագայում արդարացված չի կարող լինել։

«Մենք խստագույնս դատապարտում ենք Ադրբեջանի այսօրվա նախապես ծրագրված և չարդարացված հարձակումը Լեռնային Ղարաբաղի դեմ։ Ցավում ենք օրվա սկզբին ականների պայթյունների հետևանքով զոհվածների համար և մեր ցավակցությունն ենք հայտնում զոհվածների ընտանիքներին: Սակայն դա ոչ մի դեպքում չի արդարացնում Ադրբեջանի լայնածավալ ռազմական էսկալացիան»,- ասված է համատեղ հայտարարության մեջ։

Հայտարարության համահեղինակները կոչ են անում անհապաղ դադարեցնել բոլոր ռազմական գործողությունները՝ նշելով, որ Բաքվի եւ Ստեփանակերտի միջեւ ուղիղ բանակցությունները Լեռնային Ղարաբաղի հայերի եւ Ադրբեջանի հարաբերություններում առաջընթացի հասնելու միակ միջոցն են։

«Մենք ափսոսում ենք, որ Բաքվի հարձակումը լրջորեն խաթարում է Ադրբեջանի և Հայաստանի միջև ընթացող խաղաղ բանակցությունները և կոչ ենք անում Ադրբեջանի նախագահին ընդունել Հայաստանի վարչապետի վերջին կոչերը՝ բանակցությունները վերսկսելու ամենաբարձր մակարդակով»,- ասված է հայտարարության մեջ։

Մաքալիսթերը, Կալյուրանդը, Զովկոն եւ Կովաչեւը հիշեցրել են, որ հարձակումը տեղի է ունենում ԼՂ-ում մեծ հումանիտար ճգնաժամի համատեքստում եւ որ Ադրբեջանը խախտում է 2020 թվականի նոյեմբերի 9-ի հրադադարի մասին հայտարարության դրույթներն ու Արդարադատության միջազգային դատարանի պարտադիր որոշումները:

«Շարունակվող հարձակման անհապաղ դադարեցման բացակայության դեպքում մենք կոչ ենք անում Խորհրդին հիմնովին վերանայել Ադրբեջանի հետ ԵՄ հարաբերություններն այս լույսի ներքո և դիտարկել Ադրբեջանի պատասխանատու իշխանությունների դեմ պատժամիջոցներ կիրառելու հարցը», - ասված է համատեղ հայտարարության մեջ։