Ջոն Բոլթոնը խոստովանել է, որ օգնել է պլանավորել հեղաշրջման փորձերը արտասահմանյան երկրներում

Սպիտակ տան ազգային անվտանգության նախկին խորհրդական Ջոն Բոլթոնը խոստովանել է, որ օգնել է պլանավորել հեղաշրջման փորձերը արտասահմանյան երկրներում, հայտնում է Reuters-ը։

Բոլթոնն այս հայտարարությունն արել է CNN-ին տված հարցազրույցում՝ 2021 թվականի հունվարի 6-ին ԱՄՆ Կապիտոլիումի հարձակման վերաբերյալ Կոնգրեսի լսումներից հետո: Հանձնաժողովի օրենսդիրները նախկին նախագահ Դոնալդ Թրամփին մեղադրել են 2020 թվականի ընտրություններում պարտվելուց հետո իշխանությունը պահպանելու համար բռնություն հրահրելու փորձի մեջ:

Սակայն CNN-ի հաղորդավարի հետ զրույցում Բոլթոնը ենթադրել է, որ Թրամփը բավականաչափ կոմպետենտ չէ, որպեսզի «խնամքով ծրագրված պետական հեղաշրջում» իրականացներ՝ հավելելով. «Որպես մարդ, որն օգնել է պետական հեղաշրջումներ պլանավորել, ոչ այստեղ, այլ տեղերում, ասում եմ, որ դա շատ աշխատանք է պահանջում։ Եվ դա այն չէ, ինչով նա (Թրամփը) զբաղվում էր»:

Հստակեցնող հարցին, թե ինչ փորձերի մասին է խոսքը, Բոլթոնը պատասխանել է. «Ես մանրամասներ չեմ նշի»։ Հետո նա հիշատակել է Վենեսուելան. «Դա անհաջող էր: Ոչ թե մենք դրա հետ կապ ունեինք, այլ ես տեսա, թե ինչ արժեցավ ընդդիմության համար ապօրինի ընտրված նախագահի տապալման փորձը, ու նրանք ձախողվեցին»,- ասել է նա:

2019 թվականին Բոլթոնը, որպես ազգային անվտանգության խորհրդական, հրապարակայնորեն աջակցել էր Վենեսուելայի ընդդիմության առաջնորդ Խուան Գուայդոյի կոչին, որ զինվորականները սատարեն սոցիալիստ նախագահ Նիկոլաս Մադուրոյին պաշտոնանկ անելու նրա ջանքերը՝ պնդելով, որ Մադուրոյի վերընտրվելն անօրինական է։ Ի վերջո, Մադուրոն մնաց իշխանության գլուխ։

Տարիների ընթացքում արտաքին քաղաքականության շատ փորձագետներ քննադատել են Վաշինգտոնի միջամտությունների պատմությունը այլ երկրներում՝ սկսած 1953 թվականին Իրանի այն ժամանակվա վարչապետ Մուհամմեդ Մոսադեղի տապալումից եւ Վիետնամի պատերազմից մինչեւ Իրաք ու Աֆղանստան ներխուժումներ:

Սակայն խիստ անսովոր է, երբ ԱՄՆ պաշտոնյաները բացահայտորեն ընդունում են իրենց դերը արտասահմանյան երկրներում անկարգություններ հրահրելու գործում:

«Ջոն Բոլթոնը, որը զբաղեցրել է ամենաբարձր պաշտոններ ԱՄՆ կառավարությունում, այդ թվում՝ ՄԱԿ-ում դեսպանի պաշտոնը, անփութորեն պարծենում է, որ օգնել է այլ երկրներում հեղաշրջումներ պլանավորել»,- Twitter-ում գրել է BBC-ի լրագրող Դիքենս Օլեւեն՝ Քենիայից: