Կուրորտաբանության եւ ֆիզիկական բժշկության ինստիտուտի մասնավորեցման նպատակը ներդրումներ ներգրավելն է. Կարապետ Ավագյան

«Կուրորտաբանության եւ ֆիզիկական բժշկության գիտահետազոտական ինստիտուտ» ՓԲԸ–ն, Կառավարության հունիսի 17–ի որոշմամբ, մասնավորեցման է հանվել։ Ինստիտուտի տնօրենի ժամանակավոր պաշտոնակատար Կարապետ Ավագյանի կարծիքով՝ մասնավորեցման նպատակը հիվանդանոցը ներդրումներով զարգացնելն է։

«Մասնավորեցման նպատակը, կարծում եմ՝ ներդրումներ ներգրավելն է, այդ դեպքում պետությանը լրացուցիչ ֆինանսական միջոցներ կգնան վաճառքից, նաեւ հիվանդանոցը կզարգանա, որովհետեւ հիվանդանոցի շահույթն ու եկամուտը, եթե օրինակ, 3–4 տարվա մեջ են թույլ տալիս կապիտալ վերանորոգում անել, ինչը հիմա ընթացքի մեջ է, ապա մասնավորեցման դեպքում դա կարելի է անել 1 տարվա մեջ։ Սարքավորումները կհագեցվեն, պայմանները կբարելավվեն, հնարավոր է նաեւ այլ ծառայություններ ներդրվեն»,– NEWS.am-ի հետ զրույցում ասաց Կարապետ Ավագյանը։

Գիտահետազոտական ինստիտուտը կմասնավորեցվի պրոֆիլի պահպանմամբ, այսինքն՝ հիվանդանոցը շարունակելու է կատարել վերականգնողական իր գործառույթները։

«Այդ առումով ռիսկեր չունենք հիվանդանոցի եւ բուժաշխատողների ապագայի հետ կապված։ Այդուհանդերձ, հնարավոր է որոշ կադրային փոփոխություններ լինեն, բայց հիմնական բուժանձնակազմը, կարծում եմ՝ մնալու է, որովհետեւ նեղ մասնագիտական ուղղություն է, այս ոլորտի մասնագետներն այդքան էլ շատ չեն, որ իրենց փոխարինեն, բացի այդ, նորմալ աշխատող բուժանձնակազմ է»,– ասաց Կարապետ Ավագյանը եւ հավելեց, որ Կառավարության որոշմամբ՝ գնորդը պարտավորվում է 6 ամիս պահպանել ինստիտուտի աշխատողների թիվը եւ աշխատավարձի չափը։

Նշենք, որ գիտահետազոտական ինստիտուտն ընդգրկված էր «Պետական գույքի մասնավորեցման 2017-2020թթ. ծրագրի մասին» ՀՀ օրենքի ցանկերում եւ ենթակա է մասնավորեցման:

Կառավարությունը «Կուրորտաբանության եւ ֆիզիկական բժշկության գիտահետազոտական ինստիտուտ» ՓԲԸ–ն մասնավորեցման էր ներկայացրել նաեւ նախկինում, սակայն հայտեր չէին ներկայացվել։

«Ես պաշտոնավարում եմ մեկ տարուց ավելի, (2021. մայիսից,–հեղ.) այդ ընթացքում երկու անգամ աճուրդ է եղել, անգամ գնիջեցմամբ, մինչեւ 3, 4 մլրդ դրամով, բայց մասնակիցներ չեն եղել»,– ասաց Կարապետ Ավագյանը։

Ըստ Կառավարության՝ ընկերության բաժնետոմսերը 3,497,947.95 հազ. դրամ արժեքով չի վաճառվել, իսկ նոր գնահատված արժեքը կազմում է 5,023,162.620 հազ. դրամ»։ Առաջարկվել է ընկերության 100 տոկոս պետական բաժնետոմսերը ներկայացնել մասնավորեցման մրցույթով՝ բաժնետոմսերի վաճառքի նվազագույն գին սահմանելով գնահատված արժեքի 75 տոկոսը։

Նշենք, որ «Կուրորտաբանության եւ ֆիզիկական բժշկության գիտահետազոտական ինստիտուտ» ՓԲԸ–ի հողամասի մակերեսը կազմում է 1.7863 հա։ Ընկերությունն ունի 171 աշխատակից:

Կառավարության որոշումն ուժի մեջ մտնելուց հետո 15-օրյա ժամկետում ստեղծվելու է մրցութային հանձնաժողով՝ 3-ական անդամ ընդգրկելով Պետգույքի կոմիտեից, 3 անդամ՝ Առողջապահության նախարարությունից, 1 անդամ՝ Արդարադատության նախարարությունից: Եռամսյա ժամկետում՝ ՀՀ օրենքով սահմանված կարգով պետք է կազմակերպել եւ անցկացնել մրցույթ։

Ըստ Կառավարության՝ գնորդի կողմից վճարված գումարի 70 տոկոսն ուղղվելու է ՀՀ պետական բյուջե, իսկ 30 տոկոսը` համապատասխան համայնքի ֆոնդային բյուջե՝ ըստ գույքի գտնվելու վայրի: