Չէի ասի, թե Խաչատուր Սուքիասյանը երկրի ապագայի հետ կապված լավագույն էքսպերտն է․ Դավիթ Անանյան

Ռիսկերը, բնականաբար, բավականին շատ են, կարծում եմ՝ իշխանությունները չեն վերլուծել դրանք: Այս մասին այսօր՝ ապրիլի 18-ին, Ազատության հրապարակում լրագրողների հետ զրույցում նշեց ՊԵԿ նախկին նախագահ Դավիթ Անանյանը՝ անդրադառնալով Թուրքիայի հետ սահմանները բացելու, առեւտրային հարաբերություններ հաստատելու մասին իշխող ուժի հայտարարություններին:

«Մենք բոլորս մանկություն ենք ունեցել, եթե բակում խաղալիս վեճ ու կռիվ է ծագել, ապա պարտվածը կամ ծեծ կերածը անմիջապես չի ձգտել խաղաղության ձեռք մեկնլու, որովհետեւ այդ պայմաններում բարիշելու պայմանները միշտ եղել են ի վնաս ծեծվածի: Եթե ուզում եք խաղաղության դարաշրջան, բնականաբար, բոլորս էլ պետք է ձգտենք դրան, որովհետեւ հարեւանների հետ պետք է խաղաղ ապրել, բայց դրա համար պետք է պատեհ ժամանակ ընտրել: Կարծում եմ՝ ժամանակը պատեհ չէ»,-ասաց նա:

Անդրադառնալով տեսակետին, որ եթե Թուրքիայի հետ սահմանը բացվի, դա Հայաստանի տնտեսության համար դրական կլինի, ՊԵԿ նախկին նախագահն ասաց. «Տնտեսական քաղաքականություն իրականացնողներից պետք է հարցնել, թե իրենք ինչպես են տեսնում երկրի ապագան, երկրի տնտեսության զարգացման առումով: Եթե իրենք տեսնում են, որ, օրինակ, արտահանելի ապրանքներ ու ծառայություններ արտադրող ու արտահանող երկիր պետք է կառուցենք, ապա սահմանների բացումը ոչ միայն չի նպաստի, այլեւ կսպանի մեր տնտեսությունը, այսինքն արդյունաբերողներին ու արտադրողներին:

Եթե իրենք տնտեսության ապագան տեսնում են ուղղակի զուտ առեւտրային շփումներում, կարելի է սահմանը բացել, բայց այդ ժամանակ պետք է մոռանալ ուղղակի ազգային արտադրություն ու արդյունաբերություն ունենալու մասին: մենք աշխարհաքաղաքական այնպիսի դիրքում ենք, որ մեզ մոտ ապրանքների ու ծառայությունների ինքնարժեքը ինքստինքյան ավելի բարձր է, քան թուրքական միջինից բարձր որակ ունեցող ապրանքների ինքնարժեքը: Հետեւաբար, ցածր ինքնարժեք եւ բավարար որակ ունեցող ապրանքները կսփռվեն Հայաստանի շուկայում եւ Հայաստանը կդառնա թուրքական ապրանքների եւս մեկ շուկա: Այդ առումով Հայաստանը տնտեսական կախվածության մեջ կընկնի Թուրքիայից, որովհետեւ Թուրքիան շատ հեշտությամբ կարող է իր արտաքին առեւտուրը կարգավորի՝ մեծացնելով, ավելացնելով կամ որոշակի ապրանքների վրա դնելով սահմանափակումներ, որոշակի ապրանքների արտահանման վրա սահմանափակումներ կավելացնի: Այսինքն մենք կդառնանք մի տարածք, որտեղ տեղի է ունենում թուրքական ապրանքների շրջանառություն եւ դրա վերահսկողը Թուրքիան է լինելու: Մենք այնքան ուժեղ չենք, որ ինքներս վերահսկենք թուրքական ապրանքների շրջանառությունը Հայաստանում»:

Դիտարկմանը, որ ՔՊ-ական պատգամավոր, գործարար Խաչատուր Սուքիասյանը հանդես է գալիս հայ-թուրքական սահմանը բացելու օգտին, Դավիթ Անանյանն ասաց. «Խաչատուր Սուքիասյանը տասնամյակներ երկրում բավականին հաջող բիզնես գործունեությամբ է զբաղվում, բայց անձնապես կամ անձի առանձին տնտեսական գործունեության հաջողություններով պայմանավորված, անձը կարծում եմ՝ պետք է ձեռնպահ մնա մակրոտնտեսական, երկրի ապագայի հետ կապված խիստ մասնագիտական դատողություններ անելուց: Խաչատուր Սուքիասյանը բավականին կրթված է, տնտեսագիտություն որոշակի հասկանում է, դրա համար անձնական բիզնեսներում ունեցել է հաջողություն: Բայց երկրի ապագայի հետ կապված ես ձեռնպահ կմնայի ասել, որ ինքը լավագույն էքսպերտն է»: