Վահան Քերոբյանը նախընտրեց կանխատեսումներ չանել տնտեսական աճի հեռանկարների մասին

ՀՀ էկոնոմիկայի նախարար Վահան Քերոբյանը նախընտրեց կանխատեսումներ չանել տնտեսական աճի հեռանկարների մասին:

«Անցյալ տարի մենք լավ աճ ունեցանք, բոլոր երկրների միջեւ ապրանքաշրջանառությունը զգալիորեն ավելացել էր։ Եվ մենք ակնկալում էինք, որ այդ աճը կշարունակվի նաեւ այս տարի։ Բայց, տեսեք, քանի որ շատ արեւմտյան ընկերություններ կամ արեւմտյան որոշ ընկերություններ որոշեցին լքել ռուսական շուկան, այդ բեռի մի մասը փոխանցվեց ԵԱՏՄ գործընկերներին։ Ի սկզբանե կանխատեսվում էր, որ փոխադարձ առեւտրում անկում չպետք է լինի։ Բայց այստեղ մեծ հարց կա՝ դա ռուբլու փոխարժեքի կանխատեսելիությունն է։ Որովհետեւ Հայաստանից արտահանման պայմանագրերի մոտ 60 տոկոսը կնքվում էին ռուսական ռուբլով։ Եւ մենք տեսնում ենք, որ արտահանողներին ռուբլու փոխարժեքի անորոշությունը շատ է անհանգստացնում: Չնայած հունվար-փետրվարին մենք հսկայական աճ ունեցանք. այս երկու ամսվա ընթացքում Ռուսաստանից ներմուծումն աճել է 70 տոկոսով, իսկ արտահանումը՝ մոտ 50 տոկոսով։ Բայց մարտին մենք ուժեղ շեղում ենք տեսնում, այսինքն՝ վաճառքի նվազում։ Եւ ուստի այս հարցը պետք է շուտափույթ լուծվի, ինչը դրական լիցք կհաղորդի նախկին մակարդակի վերականգնմանը»,- ՌԲԿ-ին տված հարցազրույցում, պատասխանելով հարցին, թե ինչպիսին է տնտեսական աճի իր կանխատեսումը ներկայիս իրողությունների ֆոնին, ասել է Վահան Քերոբյանը:

«... Մեր միգրանտները փող էին ուղարկում, բայց դա, ասյպես ասած, այդքան էլ լավ փող չէ: Որովհետեւ այն մարդիկ, ովքեր ստանում են այդ գումարը, չեն աշխատել, տնտեսական ակտիվություն չեն ստեղծել։ Բացի այդ, միգրանտները հիմնականում աշխատել են Ռուսաստանի Դաշնությունում շինարարության ոլորտում, իսկ Հայաստանում շինարարության ոլորտում բազմաթիվ թափուր աշխատատեղեր կան։ Մենք տեսնում ենք, որ աշխատանքային միգրացիայի որոշակի նվազում կա, բայց կարծում ենք, որ դա կօգնի Հայաստանի համապատասխան ոլորտին, որտեղ մենք աշխատուժի սուր պակաս ունենք։ Այնպես որ, դա կրկին ե՛ւ պլյուսեր, ե՛ւ մինուսներ է»:

Մեկնաբանելով այն փաստը, որ Moody’s Investors Service վարկանիշային գործակալությունը այս տարի Հայաստանի ՀՆԱ-ի աճի կանխատեսումը 5-ից իջեցրել է 1.8 տոկոսի, Քերոբյանն ասե է, որ ի սկզբանե 2022թ. ՀՀ բյուջեում 7 տոկոս ՀՆԱ-ի աճ էր դրված: «Բայց առաջին երկու ամիսներին մենք 12 տոկոս աճ ունեցանք։ Այս տարին սկսեցինք շատ աշխույժ, եւ նպատակ ունեինք բյուջեով նախատեսված 7 տոկոսից շատ ավելիի հասնել, եւ դրա նախադրյալները կային եւ կան հիմա։ Ինչ վերաբերում է վարկանիշային գործակալություններին, ապա երբ շատ անորոշություններ կան, դրանք սկսում են կտրուկ նվազեցնել իրենց կանխատեսումները։ Եվ ես գիտեմ, որ դա անում են նաեւ միջազգային ֆինանսական կառույցները: Երբ նրանց հետ քննարկում ենք մեթոդաբանությունը, թե ինչպես են նրանք դա անում, սովորաբար ասում են. «Գուցե այսինչ սցենարն իրականություն դառնա»:

Այսինքն՝ նրանք միշտ անորոշության պայմաններում վերցնում են ամենաբացասական տարբերակները եւ դա դնում են նոր կանխատեսման մեջ։ Իրականում մենք չենք փոխում մեր նպատակները։ Եւ մենք նպատակ ունենք հասնել այդ 7 տոկոս աճին։ Պետք է հաշվի առնել նաեւ, որ այժմ պարենային ապրանքների գների ուժեղ աճի պայմաններում սպառողական զամբյուղի ինքնարժեքն աճում է, եւ բնակչության զգալի հատվածը կարող է աղքատության շեմից այն կողմ հայտնվել։ Հայաստանում կանխատեսվում է, որ աղքատությունը ներկայիս 27 տոկոսից կարող է 42 տոկոսի հասնել։ Իհարկե, տնտեսական աճ կա, բայց շատ դժվար է այնպես անել, որպեսզի տնտեսական աճը գնա բնակչության հենց խոցելի խավերի գրպանները։ Որպես կանոն, տնտեսական աճից որոշ մարդիկ շահում են, իսկ գնաճից կորցնում են մյուսները: Եւ կառավարության խնդիրն է այնպես անել, որպեսզի տնտեսական աճը փոխի հենց շատ աղքատների կյանքը»։