Ոստիկանները թույլ չէին տալիս ընդդիմադիր պատգամավորներին մոտենալ կառավարության շենք. Հրմշտոց սկսվեց. Ակցիայի մասնակիցները վանկարկում էին՝ «Նիկո՛լ, դավաճա՛ն» (Տեսանյութեր)

Կառավարության նիստում Փաշինյանը հերթական անգամ փորձում է մոլորեցնել ժողովրդին. հայրենիքի տարածքը թուրքին տալով՝ սուտ է խոսում, թե գիտեք այդ հատվածը տվել ենք, որ ուրիշ բան չտանք: Այս մասին, այսօր՝ նոյեմբերի 11-ին, կառավարության դիմաց հանրահավաքին ասաց «Հայաստան» խմբակցության պատգամավոր Գեղամ Մանուկյանը։

Նա նշեց, որ Փաշինյանն ամեն օր սուտ խոսելով՝ շատ ավելին է տալիս։

«Քանի որ այսօր՝ քիչ առաջ, նա կրկին փորձ արեց խաբել, հիմա մեր գործընկերների հետ, օգտվելով մեր սահմանադրական իրավունքից, գնալու ենք կառավարության նիստ, ուղիղ եթերում, ոչ փակ դռների հետևում, ուղղակի նրան ասելու, թե ինչ ստեր է խոսում, ինչպես է խաբում մեր քաղաքացուն։

Որևէ մեկը, կրկնում եմ պարոնայք ոստիկաններ, չի կարող արգելել մեր սահմանադրական իրավունքից օգտվելուն»,- ասաց Գ. Մանուկյանը՝ փորձելով մոտենալ կառավարության շենքին։

Ոստիկանները թույլ չտվեցին Գ. Մանուկյանին և մյուս պատգամավորներին մոտենալ կառավարության շենքին։

«Իրավունք չունեք պատգամավորի ազատ տեղաշարժը սահմանափակել, գնացեք սահմանադրություն կարդացեք»,- նշում էին պատգամավորները։

Ոստիկանների ու հանրահավաքի մասնակիցների միջև հրմշտոց տեղի ունեցավ։

«Առանց թուրքի Հայաստան», «Նիկոլ դավաճան» անընդհատ բղավում էին հանրահավաքի մասնակիցնեը։

Կառավարության շենքի մոտ ոստիկանները սկսեցին ուժ կիրառելով բերման ենթարկել բողոքի ակցիայի մասնակիցներին, այդ թվում կանանց և տարեցներին: Որևէ հիմնավորում ոստիկանների կողմից չներկայացվեց:

Ավելի վաղ հայտնել էինք, որ երեկ ԱԽ քարտուղար Արմեն Գրիգորյանը «Հանրային» ՀԸ եթերում հայտարարեց, որ ադրբեջանական կողմը հայկական կողմին տեղեկացրել է, որ Գորիս-Կապան ճանապարհի հատվածում կտեղադրի մաքսակետեր։

Ասում են, որ կառավարության շենքում առավոտյան ժամը 10-ից գործում է ուժեղացված ռեժիմ: Այս մասին էլ կառավարության դիմաց հանրահավաքին ասաց «Հայաստան» խմբակցության պատգամավոր Աննա Գրիգորյանը՝ անդրադառնալով հարցին, թե ինչու ԱԺ պատգամավորներին թույլ չտվեցին մուտք գործել կառավարության շենք:

«Անդադար ուժեղացված ռեժիմով կառավարությունը չի կարող գործել. Վաղ թե ուշ դա հանվելու է, որից հետո կհասկանանք, թե մենք ինչ ենք անում:

Այսօր ԱԺ-ում հրատապ նիստ ենք նախաձեռնել. Հանձնաժողովներից մեկում: Այնտեղ էլ այդ հարցերը բարձրաձայնելու ենք: ԱՆկեղծ չգիտեմ՝ կառավարությունից ով է ներկայացված լինելու: Այս շենքում նստած մարդիկ թող իմանան, որ ամեն վայրկյան մենք կարող ենք գալ, պատասխանները պահանջել եւ ասել՝ ովքեր են նրանք»,-ասաց նա:

Մինչև չկարողանանք քեզ հեռացնել, մեր երկիրը նորմալ չի ապրելու: Այս մասին կառավարության դիմաց հանրահավաքին հայտարարեց ԱԺ «Պատիվ ունեմ» խմբակցության պատգամավոր Հայկ Մամիջանյանը:

«Մտքովդ չանցնի հրաժարվես հաշվետու լինել քո երեկվա արած հիմարության համար: Դավաճանությունը չես մարսելու ու լավ կլինի ժամը 2-ին ներկայանաս ու ցույց տաս, թե ինչպես ես հերթական անգամ հայրենիքը ծախում: Հետո կորոշենք քո հետ ինչ անել»,-ասաց նա:

Ներկաները կսեցին վանկարկել «Նիկոլ դավաճան»:

«Հայաստան» խմբակցության պատգամավոր Գեղամ Նազարյանն ասաց, որ եթե ԱԺ-ում արտահերթ նիստ է, չի նշանակում, որ պետք է կառավարության մոտից հեռանան. «Հայաստանի յուրաքանչյուր քաղաքացի ազատ է իր բողոքի ձայնն արտահայտելու հարցում։ Այստեղ մեկ հոգիդ դարձեք տաս, հարյուր, հազար, տաս հազար, որպեսզի կանխենք մեր երկրի հետագա բզկոտումը, վերադարձնենք նույն մայրուղին, թույլ չտանք նման մաքսակետեր հայտնվեն Տավուշում, Արարատում, Սյունիքի այլ բնակավայրերում»,- ասաց նա։

«Հայաստան» խմբակցության պատգամավոր Գեղամ Մանուկյանն ասաց, որ շատ մոտ առաջիկայում հայտարարվելու է տարբեր գործողությունների մասին. «Վերջնական հստակեցումից հետո հրապարակային տեղյակ կպահվի բոլոր գործողությունների մասին»,- հայտնեց նա։

Նշենք, որ այսօր՝ նոյեմբերի 11-ին, ժամը 14։00-ին ԱԺ Մարդու իրավունքների պաշտպանության հանձնաժողովը հրավիրել է հրատապ կարգով նիստ՝ երեկ կեսգիշերից Հայաստանի սուվերեն տարածքում՝ Գորիս-Կապան մայրուղում թշնամական մաքսային և ոստիկանական հենակետ տեղադրելու և այս իշխանության կողմից այդ ամենը թույլ տալու հարցեր քննարկելու համար։ Այս մասին այսօր՝ նոյեմբերի 11-ին, կառավարության դիմաց հանրահավաքին հայտարարեց ԱԺ «Հայաստան» խմբակցության պատգամավոր Գեղամ Մանուկյանը։

Նա նշեց, որ կանչվել են հատուկ հաշվետվության նաև կառավարության ներկայացուցիչները։

«Սրանք ավելի շատ վախենում են սեփական քաղաքացիներից, քան թշնամուց, որովհետեւ թշնամու առաջ վաղուց ծնկել են: Ծնկածի հոգեբանությամբ պատրաստ են ամեն ինչ թշնամում զիջել: Ամբողջ ճշմարտությունը այս իշխանությունների երեսին ասվելու է: Երբ որ ամեն մի քաղաքացի իր կեցվածքով, իր դիմադրությամբ այդ ճշմարտությունը ասի, այդժամ շատ ավելի մոտ է լինելու սրանց այս շենքից դուրս շպրտելու օրը»,-ասաց նա: