Ինչո՞ւ պետք է Հայաստանում լինի Բայդենին նվիրված պաստառ, իսկ Պուտինին՝ ոչ. Պուտինի նկարով վահանակների հեղինակ
Սեպտեմբերի 17–ից Հայաստանի մի քանի մարզերում գովազդային վահանակների վրա հայտնվել են ՌԴ նախագահ Վլադիմիր Պուտինի նկարը Կրեմլի ֆոնին՝ «Հավերժ միասին» գրությամբ։ Նախաձեռնության հեղինակը «Հայաստանի կումինստական կուսակցության» կենտկոմի առաջին քարտուղարի պաշտոնակատար Երջանիկ Ղազարյանն է։ Նա News.am-ի հետ զրույցում նշել է, որ իր միջոցներով է պատվիրել վահանակները, թեև կուսակցությունում կիսում են նույն քաղաքական հայացքները, սակայն սա իր անհատական նախաձեռնությունն է։
«44-օրյա պատերազմը կանգնեցվեց Վլադիմիր Պուտինի ջանքերով և ընթացքում մի քանի անգամ էլ փորձել է, բայց Հայաստանի ռազմաքաղաքական ղեկավարությունը դրան ընթացք չի տվել։ Պատերազմը կանգնեցնելուց հետո Արցախի 25 %-ը մնաց, փրկվեց հայաթափությունից, իսկ սոցիալական վիճակը ռուս խաղաղապահների միջոցով այս պահին կարգավորվում է։ Եվ եթե մեր պատմությանն էլ հետհայացք նետենք, կտեսնենք, թե քանի անգամներ է Ռուսաստանն օգնել Հայաստանին»,- նշեց նա։
Ըստ Երջանիկ Ղազարյանի՝ սխալ է, որ Հայաստանում լինի ԱՄՆ նախագահ Ջո Բայդենին նվիրված պաստառ, իսկ մեր բարեկամ երկրի նախագահին նվիրված պաստառ՝ ոչ։
«Պատերազմի ժամանակ որտե՞ղ էր Բայդենը․ իր ընտրություններով էր զբաղված։ Որտե՞ղ էր Մակրոնը, որ հիմա ջրի երես է դուրս եկել, իր աշխարհաքաղաքական շահերից ելնելով խլրտոց է փորձում մտցնել հայ-ռուսական հարաբերությւուններում։ Քիչ էին Հայաստանի սորոսական իշխանությունները, հիմա էլ՝ նրանք։ Հակառուսական տրամադրություններ են փորձում բարձրացնել Հայաստանում՝ չհասկանալով, որ դա ոչ մի լավ բանի չի բերում։ Ճիշտ ժամանակն էր պաստառի տեղադրման համար։ Հայաստանին բոլոր դժվարին ժամանակներում օգնել է Հայաստանը, իսկ պատերազմից հետո էլ պարզ դարձավ, որ մենք մեր անվտանգությունը միայնակ չենք կարող հոգալ, ցավոք սրտի»,- ասաց Երջանիկ Ղազարյանը։
Ղազարյանը նշեց, որ պաստառի վերաբերյալ հնչող քննադատություններին ինքը շատ նորմալ է վերաբերվում։
«Ապրում ենք ժողովրդավարական երկրում, և ամեն անձ ունի իր դիրքորոշումը հայտնելու իրավունք, ես էլ իմ կարծիքը նման ձևով եմ արտահայտել։ Ես այդ քննադատություններին չեմ պատասխանում՝ գիտակացելով որտեղից են դրանք գալիս»,- ընդգծեց նա։
Երջանիկ Ղազարյանի խոսքով՝ պաստառներ են տեղադրված Գորիսում, Սյունիքի մարզի՝ Նոր Հայք համայնքում, Կոտայքի մարզի՝ Քաղսի համայնքում։ Երևան-Սևան մայրուղու վրա և Փարաքարի ճանապարհին՝ դեպի օդանավակայան գնացող ճանապարհին տեղադրված են երկկողմանի պաստառներ։ Պաստառ տեղադրված է եղել նաև Գյումրիում, սակայն հանվել է նախընտրական քարոզարշավից առաջ։
«Այդ վահանակները ընտրությունների ժամանակ հատկացվում են ընտրություններին մասնակցող ուժերին, և քանի որ պաստառը նախընտրական իմաստ չունի, այն հեռացրել ենք»,- ընդգծեց Երջանիկ Ղազարյանը։
Նախաձեռնության հեղինակը հրաժարվեց նշել, թե որքան գումար է ծախսել պաստառների համար։
Հարցին, թե հնարավո՞ր է, որ պաստառները տեղադրվեն նաև Երևանում, Ղազարյանը նշեց, որ այս պահին հարցը ցանկանում է թողնել առանց մեկնաբանության։