«Կարծում եմ՝ ԱՄՆ-ն Աֆղանստանում ձախողել է»․ Պակիստանի վարչապետ

Պակիստանի վարչապետ Իմրան Խանը PBS NewsHour հաղորդմանը տված հարցազրույցում քննադատել է Աֆղանստանում Միացյալ Նահանգների առաքելությունը՝ նշելով, որ ամերիկյան կողմը «Թալիբան» շարժման հետ հակամարտությանը քաղաքական լուծում գտնելու հարցում ձախողել է, հայտնում է russian.rt.com-ը։

«Կարծում եմ՝ ԱՄՆ-ն Աֆղանստանում ձախողել է։ Սկզբում փորձում էին ռազմական լուծում գտնել Աֆղանստանում, որն ընդհանրապես գոյություն չուներ, իսկ ինձ պես մարդիկ, որոնք ասում էին, որ ռազմական լուծում գոյություն չունի, որոնք գիտեին Աֆղանստանի պատմությունը, կոչվում էին հակաամերիկացիներ։ Նրանք ինձ անվանում էին «Թալիբան Խան»», - ասել է Պակիստանի վարչապետը և հավելել, որ Միացյալ Նահանգները վերջապես եկել է այն եզրահանգմանը, որ ռազմական լուծում չկա։

Իմրան Խանը նշել է, որ քաղաքական լուծում գտնելու ճիշտ ժամանակն այն պահն էր, երբ Աֆղանստանում ՆԱՏՕ-ի 150 հազար զինվոր կար, իսկ զորքերի կրճատումն ու դուրսբերման ժամկետների սահմանումը թալիբների կողմից ընկալվել է որպես հաղթանակ։ Վարչապետը նշել է, որ այժմ փոխզիջման գնալն ավելի բարդ է լինելու։

Լրատվականը հիշեցրել է, որ հուլիսի 24-ին Պակիստանը զորք է ուղարկել Աֆղանստանի հետ սահման՝ հսկողության համար, իսկ ավելի վաղ հայտարարել էր փախստականների համար սահմանները չբացելու մասին։ Փոխարենը, Իսլամաբադը կարող է դիմել փախստականների կացարանների «իրանական մոդելին», որով նախատեսվում է սահմանի երկայնքով բնակավայրեր ստեղծել և թույլ չի տալիս փախստականներին հաստատվել ընդունող երկրի քաղաքներում:

Հիշեցնենք, որ «Թալիբան» շարժումն իր գործունեությունն ակտիվացրել է երկրից ամերիկյան զորքերի դուրս գալուն զուգընթաց: Թալիբները վերահսկողություն են հաստատում երկրի տարբեր հատվածներում, ինչպես նաև սահմաններին: