Սպանվածի որդին պայքարում է, որ Հրանտ Գրիգորյանը հայտնվի բանտում. ՀՐԱՊԱՐԱԿ

28 տարի առաջ՝ հրազենային կրակոցից սպանված Մհեր Պողոսյանի որդին՝ Էդուարդ Պողոսյանը, հետևողականորեն պայքարում է, որ հորը սպանողը, իր համոզմամբ՝ ՀՀ ԱԺ նախկին պատգամավոր Հրանտ Գրիգորյանը, հայտնվի բանտում: Էդուարդը, սպանության գործը վերաբացելու պահանջ էր ներկայացրել 2018 թվականի իշխանափոխությունից հետո՝ լիահույս, որ երկրի նոր կառավարիչները ևս շահագրգիռ կլինեն կոծկված հանցագործության բացահատման հարցում:

Սպանության գործով երևան եկած հանգամանքների լույսի ներքո 2020 թվականին նոր դատաքննություն էր սկսվել: Գործը վարույթ ընդունելու ՀՀ վերաքննիչ դատարանի որոշման դեմ վճռաբեկ բողոք էր ներկայացրել Հրանտ Գրգորյանի փաստաբանն ու մերժվել: Այդ ընթացքում հետապնդման ու հարձակման փորձեր էին սկսվել սպանվածի որդու՝ Էդուարդի նկատմամբ: Վերաբացված ու նոր թափով ընթացող գործը, սակայն, նորից սկսել է դոփել տեղում: Լռել էր նաև սպանվածի որդին:

Էդուարդ Պողոսյանի տևական լռությունը, պարզվեց՝օբյեկտիվ պատճառներ ունի: «Ոչ վախենում ենք, ոչ հոգնել ենք պայքարելուց, ոչ էլ նահանջելու ենք: Մեկ տարվա լռությունը համավարակով ու պատերազմով է պայմանավորված: Բարոյական չէր լինի, եթե այդ օրերին՝ համատարած ցավի մեջ, մենք 28 տարի առաջվա սպանության մասին բարձրաձայնեինք: Բայց այդ ընթացքում մենք պարապ չենք նստել. ակտիվ աշխատել ենք ու մեր համար լավ, Հրանտ Գրիգորյանի համար՝ վատ նորություններ ունենք»,- ասաց այս պահին Միացյալ Նահանգներում գտնվող Էդուարդ Պողոսյանը:

Վերջինիս տեղեկացմամբ՝ ընդհատված դատավարությունը կշարունակվի օգոստոսի 28-ին: Էդուարդը հավատում է արդարադատության հաղթանակին, հավատում է,  որ վերջապես իրական հանցագործը կհայտնվի անազատության մեջ: «Չնայած Հրանտ Գրիգորյանի փաստաբանը գործի վարույթը կարճելու միջնորդություն է ներկայացրել, հիմնավորելով, թե՝ վաղեմության ժամկետն անցել է, նյութերն էլ ոչնչացվել, բայց մենք ունենք շատ նյութեր ու ծանրակշիռ ցուցմունքներ, որ լույս կսփռեն գործի ընթացքին»:

Չնայած լավատեսությանը, Էդուարդ Պողոսյանն, այնուամենայնիվ, մտավախություն էլ ունի: Կարծում է՝ կգտնվեն գործին մոտ կանգնած պաշտոնյաներ, որ կփորձեն նորից կոծկել իրական մարդասպանին: «Ըստ իմ ինֆորմացիայի՝ Արմավիրի առաջին ատյանի դատավորը, որ պետք է վարի դատը, ծանոթ է Հրանտ Գրիգորյանին, և չի բացառվում, որ կարող են հանցավոր գործարքի գնալ: Ես չեմ պնդում, ուղղակի իմ ունեցած ինֆորմացիան եմ փոխանցում: Հենց դրանից էլ մի քիչ վախենում եմ»: 

Հիշեցնենք, որ սպանվածը Էջմիածնի «Տոչպրիբոր» գործարանի տնօրենն էր: Սպանվել էր 1994 թվականին՝ հրազենային կրակոցից՝ Մանվել Գրիգորյանին պատկանող Ակնալճի ամառանոցում: Աշտարակի շրջանի ժողդատարանը մեկ օրվա ընթացքում քննել էր գործը և վճռել, որ Հրանտ Գրիգորյանը զենքի հետ անզգույշ է վարվել, ինչի համար նրան դատապարտել էր մեկ տարվա ազատազրկման:

Տարիներ անց սպանվածի որդին, ՀՀ պաշտպանության նախկին փոխնախարար Աստվածատուր Պետրոսյանի ստորագրությամբ հաստատված կարևոր փաստաթուղթ էր հայտնաբերել ընտանեկան արխիվից: Ըստ այդ փաստաթղթի՝ Մհեր Պողոսյանը զոհվել է Ղարաբաղում՝ ծառայողական պարտականությունները կատարելիս: 
Մհեր Պողոսյանի ընտանիքը կտրականապես հերքում է նրա՝ Ղարաբաղյան պատերազմին մասնակցելու հանգամանքը: Շինծու փաստաթուղթն էլ հենց երևան եկած նոր հանգամանքն է, որը Էդուարդի համոզմամբ՝ նոր բացահայտումների կտանի: