Պաշտոնյա. Հայաստանում պայմանները թույլ են տալիս խուսափել կաթնամթերքի գների բարձրացման հետ կապված խնդիրներից
Հայաստանում կաթնամթերքի արտադրման ոլորտում աշխատող ընկերությունները բավական շատ են, ինչը տեսականորեն թույլ է տալիս խուսափել կաթնամթերքի գների բարձրացման հետ կապված խնդիրներից: Այս մասին այսօր՝ ապրիլի 12-ին, քննարկումների ժամանակ հայտարարեց ՏՄՊՊՀ նախագահ Գեղամ Գեւորգյանը:
Նրա խոսքով՝ վերջին 2 տարում կաթնամթերքի շուկայում անցկացվել են երեք խոշոր ստուգումներ, եւ ամեն անգամ հայտնաբերվել են ավելի ու ավելի քիչ խախտումներ:
Նա նշեց, որ պետությունը ձգտում է բացառել խախտումները, եւ նոր օրենքի նորմերն ուղղված են հենց դրան եւ տնտեսվարող սուբյեկտների համար դժվարություններ ստեղծելու նպատակ չունեն:
«Մենք գնում ենք ոչ թե սակագների ավելացման, այլ բարեխիղճ մրցակցության համար պայմաններ ստեղծելու ուղղությամբ: Արտադրողների եւ սպառողների միջեւ հարաբերությունները պետք է արդար լինեն: Սպառողները պետք է հստակ իմանան՝ ինչ են գնում՝ թթվասեր, թե, օրինակ, բուսայուղ պարունակող մթերք»,-նշեց Գեւորգյանը:
Պաշտոնյան հավելեց, որ բարեխիղճ ընկերություններն իրենց ամուր տեղն ունեն շուկայում: