«Մանկապարտեզներում ընդունելությունը պատշաճ կազմակերպված չէ, մոտ 12 հազար երեխա կա, որ սպասում է իր հերթին». ծնողները բողոքի ակցիա էին անում քաղաքապետարանի մոտ (տեսանյութ)

Մանկապարտեզներում ընդունելությունը չեն կազմակերպում, ամեն տեղ դիմել ենք՝ քաղաքապետարան, համայնքապետարան, մանկապարտեզներ, բոլորը տարբեր պատասխաններ են տալիս, տարբեր ժամկետներ են ասում ու չեն կանչում: Այս մասին այսօր քաղաքապետարանի դիմաց մանկապարտեզների ընդունելության ոչ պատշաճ կազմակերպման դեմ ակցիայի ժամանակ լրագրողների հետ զրույցում ասաց ծնողներից Լուսինե Սարգսյանը:

«Իմ բալիկը դեռ 2019 թվականին կարող էր մանկապարտեզ գնալ, բայց չեն կանչել, կարանտինի վիճակը մեղմացել է, բայց մոտ 12 հազար երեխա կա, որ հերթի մեջ սպասում են իրենց մանկապարտեզ կանչելուն»,- ասաց ծնողներից մեկը:

Ծնողի խոսքով՝ այսօր էլ քիչ ծնողներ են եկել բողոքը ներկայացնելու, քանի որ չեն կարող երեխաներին մենակ թողնել տանը, նաև խնդիրներ են առաջանում ծնողների աշխատելու հետ կապված, նրանք ստիպված տանն են մնում՝ աշխատանքի չգնալով:

Ծնողներին մոտեցավ Երևանի քաղաքապետի մամուլի խոսնակ Հակոբ Կարապետյանը և նշեց, որ քաղաքապետարանը տեղյակ է խնդրին, քայլեր է ձեռնարկում մանկապարտեզներում հավելյալ տեղեր և խմբեր ավելացնելու համար:

Վերջինս նշեց, որ անցած տարի չեն եղել ընդունելություններ, որը պայմանավորված է եղել համավարակով: «Երևանի քաղաքապետարանի համապատասխան ստորաբաժանումները, համակարգող փոխքաղաքապետը նախաձեռնել են քննարկումներ համապատասխան գերատեսչությունների հետ հարցին լուծում տալու համար՝ հասկանալով լարվածությունը, շատ աշխատող ծնողների երեխաներին մանկապարտեզ տանելու խնդիրները»:

Կարապետյանը նշեց, որ խնդիրը լուծմանը մոտ է և առաջիկայում հարցի ինչ-որ լուծում կլինի:

Ծնողն արձագանքեց, որ որևէ պատասխան նրան չգոհացրեց, քանի որ հնչեցվեցին խոսքեր, որոնք արդեն նախկինում լսել էին, բայց ամենակարևոր հարցն այն է, ամեն ծնող հնարավորություն չունի մասնավոր մանկապարտեզ տանելու, իսկ պետականի համար դիմած ծնողները ստիպված են լինում տարիներ սպասել, որն ավելի է բարդացնում իրավիճակը:

Ակցիա քաղաքապետարանի դիմաց՝ մանկապարտեզներում ընդունելության ոչ պատշաճ կազմակերպման համար