Դիվանագիտական ճակատը ձախողված էր պատերազմից առաջ, իսկ մարտի դաշտում բանակը միայնակ էր. Արմեն Աշոտյանը՝ ԱԳ նախարարի հայտարարության մասին
Դիվանագիտական ճակատը ձախողված էր պատերազմից առաջ, իսկ մարտի դաշտում բանակը միայնակ էր։ Այս մասին ֆեյսբուքյան իր էջում գրել է ՀՀԿ փոխնախագահ Արմեն Աշոտյանը՝ անդրադառնալով ավելի վաղ ԱԳ նորանշանակ նախարարի հայտարարությանն առ այն, որ ռազմադաշտում ձախողում ունեցել ենք, դիվանագիտության մեջ՝ ոչ: Աշոտյանի գրառումը՝ ստորև.
«Հայաստանի ԱԳ նորանշանակ նախարարին փոխանցեք, որ հայկական բանակը չի պարտվել։
Պատերազմը մոտեցրել է, պատերազմն ուժգնացրել է, պատերազմում մեզ միայնակ է թողել, պատերազմից առաջ երկիրը թուլացրել է եւ պատերազմում պարտվել է գործող դավադիր խունտան։
Պատերազմի փաստի եւ արդյունքների մեջ հսկայական մեղք ունի ՀՀ ԱԳ նախկին նախարարը։
Ազգային աղետի ներկա ծավալներում արտաքին քաղաքական գերատեսչության մեղավորությունն ավելի մեծ է, քան հայ զինվորականինը։
Դիվանագիտական ճակատը ձախողված էր պատերազմից առաջ, իսկ մարտի դաշտում բանակը միայնակ էր։
Ձեր դավադիր խունտան թշնամուն հանձնեց անգամ այն տարածքները, որ բանակն արյամբ պահել էր։
Նամուս ունեցեք. սսկվեք ու ստոր հիմարություններ մի խոսեք։
Չնայած ինչու եմ զարմանում։ Նամուս ունեցող մարդը դավաճանի կողքին չէր մնա»:
Նշենք, որ ավելի վաղ ՀՀ արտաքին գործերի նախարար Արա Այվազյանը, այսօր Կառավարության նիստից հետո պատասխանելով Tert.am-ի հարցին, թե որպես նորանշանակ նախարար ինչ է կարծում, կարո՞ղ էինք ավելին ստանալ պատերազմի դադարեցման փաստաթղթից և համարում է արդյոք այն ձախողված փաստաթուղթ, ասել է, որ Նիկոլ Փաշինյանը հայտարարել է, որ ստանձնում է ամբողջական պատասխանատվությունը մինչև պատերազմը և պատերազմից հետո:
«Դա Ձեր որակումն է, ես չեմ մեկնաբանում, ես նոր եմ ստանձնել իմ պարտականությունը: Ռազմադաշտում ունեցել ենք ձախողում, դա պետք է ճիշտ գնահատենք, որովհետև անհամաչափ ուժերի դեմ էին հերոսաբար մեր զինվորները դիմադրում, հիմա ամբողջ մեր խնդիրն է անել հնարավորը, որպեսզի կայունանա իրավիճակը»,– ասել է նա:
Հարցին, թե դիվանագիտության մեջ ունեցե՞լ ենք ձախողում, նա պատասխանել է. «Ոչ, դիվանագիտության մեջ մենք ձախողում չենք ունեցել»: