Ախալցխայում կորոնավիրուսից հայեր են մահացել՝ հայրը և դուստրը, նրանց չեն ընդունել հիվանդանոց

Նոյեմբերի 23-ին մահացել է դուստրը, իսկ 24-ի առավոտյան՝ հայրն ինքը... Ախալցխայի շրջանի Ծխալթբիլա գյուղում հայրն ու դուստրը մահացել են կորոնավիրուսից: Ընտանիքի անդամները լրագրողներին հայտնել են, որ տարեց տղամարդը դիմել է կլինիկա, սակայն հրաժարվել են նրան ընդունել:

«Մեր բժիշկն ասաց, որ շտապօգնություն կանչեք: Շտապօգնությունում ասացին, որ պետք է անպայման հիվանդանոց գնան: Դուստրը մահամերձ տանն էր, հայրն ինքը մյուս դստեր հետ գնաց հիվանդանոց, որտեղ նրան ասացին, որ այսօր Գիորգոբա է, բժիշկներ չկան, նա վերադարձավ տաքսիով՝ լաց լինելով: Նախօրեին մահացավ դուստրը, իսկ երեկ առավոտյան՝ ինքը»,- «Ռուսթավի-2» հեռուստաընկերությանը տված հարցազրույցում պատմել է մահացածների ազգականը՝ Լիդա Պողոսյանը:

Տեղի բժիշկ Վահան Վահանյանի խոսքով՝ ինքն անձամբ զննել է քովիդով վարակված հորն ու դստերը, որից հետո շտապօգնություն է կանչել՝ Ախալցխայում կլինիկա հոսպիտալացման համար:

«Շտապօգնության բրիգադը տուն չի եկել: Ընտանիքի անդամներին հայտնել են, որ հիվանդն ինքը պետք է գա կլինիկա: Համագյուղացիները տարեց տղամարդուն տեղափոխել են Ախալցխայի հիվանդանոց: Այնտեղ բուժքույրերը ասել են, որ տեղ չունեն, դրանից հետո նա վերադարձել է, իսկ հաջորդ օրը առավոտյան ժամը վեցին նա մահացել է»,- ասել է Վահանյանը «Ռուսթավի-2»-ին տված հարցազրույցում: