Որևէ մեկին չի հաջողվի Շուշին գրավել․ թշնամին ծնկաչոք զինադադար է խնդրելու, չենք գնալու

Որևէ մեկին չի հաջողվի գրավել Շուշին: Շուշին գրավվեց 92թ-ին՝ հայի խելքով, հայի դուխով: Եվ հիմա ինչ էլ փորձեն անել, Շուշին չեն կարող գրավել: Այս մասին «Առաջին լրատվական»-ի հետ զրույցում ասել է ԵԿՄ Երևանի կենտրոն տարածքային բաժանմունքի նախագահ Ռոմիկ Մխիթարյանը՝ անդրադառնալով դիտարկմանը, որ հակառակորդը նախօրեին հարձակում է գործել Շուշիի ուղղությամբ, սակայն ջախջախվելով հետ է շպրտվել՝ տալով ավելի քան հարյուր զոհ:

«Փաստենք, որ ի սկզբանե իրենց պլանները ձախողվել են: Իրենց երազած բլից-կրիգը չի իրականացել, իրենց խնդիրները չեն կարողացել լուծել ու չեն կարողանալու: Մենք ջարդել ենք ու ջարդելու ենք իրենց ողնաշարը, ուրիշ տարբերակ չկա»,- ասաց Մխիթարյանը՝ հավելելով, որ վստահում ու հավատում է և ռազմական և քաղաքական ղեկավարությանը. այն տրամադրվածությունը, որ կա, և այն գործողությունները, որոնք իրականացվում են, տանում են դեպի հաղթանակ:

Դիտարկմանը, որ կա տեսակետ, թե այս պահին մեզ համար ձեռնտու չէ զինադադարը՝ հաշվի առնելով ներկա պահի բնագծերը, Մխիթարյանը նշեց. «Իհարկե ձեռնտու չէ, այսքանից հետո, մեկ ամսից ավելի է, կռիվը է գնում, էդքան երիտասարդ կյանքեր տալուց հետո հիմա ի՞նչ զինադադարի մասին է խոսքը: Իրենք աղաչելու են, ծնկաչոք են խնդրելու զինադադար, մենք չենք գնալու զինադադարի: Դիրքերում կանգնած տղերքը չեն գնա զինադադարի: Մենք հիմա նախկինից մի բան էլ ավելի ենք, ու պետք է այնպես անենք, որ էլ երբևիցե իրենց մտքով չանցնի նայել Արցախի կողմը, ու այդպես էլ լինելու է: Ես ձեզ ասում եմ մարտի դաշտի տղաների տրամադրվածության մասին, ու հենց այդպես էլ լինելու է»:

Անդրադառնալով թիկունքում նշմարվող պարտվողական տրամադրություններին, Մխիթարյանը նշեց, որ սարերի ու ձորերի տարբերություն կա այստեղի ու առաջնագծի տրամադրությունների միջև. «18-20 տարեկան զինվորները 5-7 հոգով կարողանում են հարյուրի դեմ կռվել ու սատկացնել, և հանկարծ այստեղ ինչ-որ մեկը խոսում է պարտվելո՞ւց: Չկա այդպիսի բան: Ոնց գալիս են, այդպես էլ կոտորվում են, զրահատեխնիկայի ահռելի վնաս էլ ենք տվել: Մենք կռվում ենք նույն դուխով, ինչ-որ 90-ականներին, ինչ-որ մեր պապերն ու նախնիները»,- ասաց ԵԿՄ Երևանի կենտրոն տարածքային բաժանմունքի նախագահը՝ հորդորելով դադարեցնել պարտվողական տրամադրություններն ու խոսակցությունները և վստահեցրեց՝ հաղթանակը կերտելու պրոցեսի մեջ ենք:

Մանրամասն՝ տեսանյութում: