Այսօրվանից սահմանափակումների մեծ մասը հանվել է. ի՞նչ կարող են անել մարդիկ, որ առաջ չէին կարող

Այսօրվանից սկսած Հայաստանում տեղարշարժի թերթիկի անհրաժեշտություն այլևս չկա, բազմաթիվ ոլորտների գործունեությունը թույլատրվել է, սակայն դեռ գործում են որոշ սահմանափակումներ:

Մասնավորապես, չի գործելու տրանսպորտը, թեեւ պարետ Տիգրան Ավինյանն ասաց, որ շուտով այդ արգելքը եւս կհանվի: Այս սահմանափակումը դեռ կգործի՝ նկատի ունենալով համավարակի տարածման հետ կապված հասարակական տրանսպորտի բարձր ռիսկայնությունը: Փոխարենը գործում են տաքսիները։

Արդեն իսկ հանվել էին միջմարզային սահմանափակումները: Այս մոտեցումը պահպանվում է, փոխարենը՝ վարակի տարածումից կամ օջախային լինելու ռիսկից կախված՝ կարող է ժամանակավորապես փակվել առանձին համայնքների ելումուտը:

Հանվել են տնտեսական գործունեության գրեթե բոլոր տեսակների վերաբերյալ սահմանափակումները: Մայիսի 4-ից գործում են միայն բացօթյա ռեստորանները, սրճարանները, իսկ փակերը դեռեւս չեն գործի:

Թույլատրվում են հետեւյալ գործունեության տեսակները.

• Ամբողջ մշակող արդյունաբերությունը, այդ թվում՝ տեքստիլը, կահույքը, կոշիկը, պոլիգրաֆիան և այլն,

• Շինարարության ավարտական փուլի աշխատանքները,

• Մեծածախ և մանրածախ առևտուրը, սակայն՝ միայն մասնագիտացված ու ոչ մասնագիտացված խանութներում ու կրպակներում: Մոլերը, առևտրի կենտրոնները և շուկաները շարունակում են փակ մնալ, դրանցում կարող են գործել միայն սննդամթերքի ու գյուղատնտեսական արտադրանքի վաճառքի կետերը, դեղատները,

• Տեղեկատվության և կապի ոլորտն ամբողջությամբ:

Կգործեն բուսաբանական և կենդանաբանական այգիները, բնության հատուկ պահպանվող տարածքները, արգելոցները: Սպորտային ակումբների ու օբյեկտների գործունեությունը կթույլատրվի՝ բացառապես պրոֆեսիոնալ մարզիկների մասնակցությամբ սպորտային միջոցառումների անցկացման և մարզումների իրականացման համար:

Կգործեն նաեւ լվացման, մաքրման և չոր մաքրման ծառայությունները, վարսավիրանոցները, գեղեցկության սրահները, մարմնի խնամքի ծառայությունները:

Հայաստանում տնտեսական գործունեության տեսակների, ազատ տեղաշարժի սահմանափակումների վերացմանը զուգահեռ մի քանի ուղղություններով մշակվել են ուղեցույցներ, թե աշխատավայրերում ինչպիսի կանոններ պետք է գործեն: Դրանք կօգնեն գործատուներին ավելի արդյունավետ կազմակերպել կանխարգելիչ աշխատանքները:

Կանոններն ու ուղեցույցները հրապարակված են կառավարության կայքէջում, նաև Covid19.gov.am կայքում:

Սկզբունքները նույնն են բոլոր տեսակի գործունեությունների համար՝ աշխատողների միջև, հաճախորդների հետ շփվելիս ապահովել սոցիալական հեռավորություն, հիգիենիկ տարբեր միջոցառումների իրականացում՝ ախտահանումներ, օդափոփոխություն, ձեռքերի հաճախակի լվացում:

Այն դեպքերում, երբ աշխատողները կամ հաճախորդները կունենան ջերմություն, պետք է անպայման լքեն աշխատավայրը և դիմեն բժշկի:

Մյուս կարևոր միջոցառումների շարքում է խոցելի խմբերի՝ 65 տարեկան և բարձր անձանց, ինչպես նաև քրոնիկ հիվանություններով տառապող անձանց հեռահար աշխատանքների կազմակերպումը՝ հնարավորության դեպքում: Տնտեսական գործունեությամբ զբաղվող կազմակերպությունները պետք է աշխատեն բացառել ժողովների անցկացումները կամ փոքրաթիվ անձանցով պետք է անցկացնեն՝ նորից ապահովելով սոցիալական հեռավորությունը: Գործող բացօթյա սրճարաններում, ռեստորաններում մատուցողները պետք է կրեն պաշտպանիչ դիմակ, ձեռնոց:

Հիշեցնենք, որ արտակարգ դրություն Հայաստանում հայտարարվել է մարտի 16-ին՝ մեկ ամսով, սակայն մարտի 24-ին խստացվել է արտակարգ դրության ռեժիմը, սահմանփակվել էր մարդկանց ազատ տեղաշարժի իրավունքը: Այնուհետեւ ապրիլի 14-ին արտակարգ դրության ռեժիմը երկարացվել է եւս մեկ ամսով մինչեւ մայիսի 14-ը, ժամը 17-ը: