Կիևյան թաղամասի բնակիչները կրկին ահազանգում են. Ամեն օր նույն ժամին էլեկտրաէներգիան անջատվում է. Դեկտեմբերից առ այսօր իրավիճակը չի փոխվել

«Ամեն շաբաթ, ամեն օր, իսկ այս շաբաթվա մեջ արդեն երկու օր իրար հետևից, այսինքն՝ երեկ ու այսօր, ի դեպ, նույն ժամին, տեղի են ունենում էլեկտրաէներգիայի անջատումներ: Ամբողջ երկիրը կարանտինի մեջ, մեզ բոլորիս ասում են՝ տանից դուրս մի՛ եկեք, ամեն ինչ փակ է, ուսումնական հաստատությունները, գրասենյակները, բոլորը սովորում և աշխատում են տանից, իսկ այս անօրենները ամեն օր լույս են անջատում»,- այս մասին այսօր Operativ լրատվականին ահազանգել է քաղաքացին, ով բորբոքված ասում էր, որ ամեն անգամ զանգահարելիս չարաբաստիկ 1 80, ստանում են միակ պատասխանը, թե վթար է, 1-2 ժամից կվերականգնվի : 

«Երևի բոլորդ գիտեք, ինչ դժվար է այդ օպերատոր կոչեցյալներին զանգելը, մինչև մի տասը ժամ հետո վերցնում են, մինչև ասում ես՝ ինչ խնդիր է, կրկին լսում ես` վթար է, հա, վթար է: Այդ ի՞նչ վթար է, որ ամեն օր բնակիչների նյարդերի հաշվին չեն կարողանում դեմն առնել»,- բորբոքվում է քաղաքացին:

Նա հավելեց, որ այսօր արդեն մեկ ժամվա մեջ երկու անգամ էլեկտրաէներգիան անջատվել է:

Ըստ բնակչի` խոսքը Կիևյան թաղամասի մասին է, որը տևական ժամանակ է, ինչ չկա էլեկտրաէներգիայի մասին անջատումների ցուցակներում, որոնք ամենատարբեր լրատվամիջոցները ամեն առավոտ հրապարակում են: 

Հիշեցնենք, ավելի վաղ, 2019 թվականի դեկտեմբերին Կիևյան թաղամասի բնակիչները կրկին ահազանգում էին Operativ լրատվական՝ նույն խնդրով:

Բնակիչները բորբոքված ահազանգել էին՝ պատմելով, որ ինչքան զանգահարում են 1-80 հեռախոսահամարով, կամ հեռախոսը միշտ զբաղված է, կամ հնչում է ինքնապատասխանիչի ձայնը՝ «Բոլոր օպերատորները զբաղված են, խնդրում ենք սպասել, կամ զանգահարել մի փոքր ուշ»:

«Հետաքրքիր է, այդ ինչո՞վ են զբաղված, սուրճ խմելո՞վ-, ասում էին բնակիչները: Դա էլ հերիք չէ, պատասխանելիս ամեն անգամ օպերատորն ասում է՝ «Վթար է, 1-2 ժամից լույսը կլինի»:

Բնակիչները ասում էին, որ բողոքում են, բորբոքվում, բղավում օպերատորների վրա, բայց իրավիճակը չի փոխվում:

Հ.Գ. Ստացվում է, դեկտեմբերից առ այսօր, իսկ օրացույցով 17:04:2020-ն է, իրավիճակը չի փոխվել: Ա՞յդ ինչ մասշտաբի վթար է, որ այսքան ամիս դեմն առնել չի լինում: