Հարգելի պարոն Փաշինյան, հարգելի պարետ Ավինյան, այդ օրենքներն այնպես կազմեք, որ բոլորին հասանելի լինեն. Ստամոսքը չի հարցնում՝ որ կետին ես համապատասխանում

Երթուղայինի վարորդները բողոքի ակցիա են իրականացնում՝ պահանջելով Կառավարությունից արտակարգ դրության պայմաններում իրենց որոշակի գումար հատկացնել։

Լրագրողների հետ զրույցում վարորդներից մեկը նշել է, որ իրենք մարտի 1-ից չեն աշխատում և աշխատավարձ չեն ստացել. «Դիմել եմ Երևանի քաղաքապետարան, սակայն հստակ պատասխան չեմ ստացել, քաղաքապետարանը դիմումներին որևէ արձագանք չի տվել։ Մեզ համար էլ թող ծրագիր մշակեն և որևէ աջակցություն տրամադրեն, քանի որ 11 ծրագրերից ոչ մեկին չենք համապատասխանում։ Հայ ենք, գիտենք՝ ինչ իրավիճակ է։ Մենք ուղղակի ուզում ենք իմանալ, թե ո՞ր կետերին կարող ենք համապատասխանել, մեզ էլ ինչ-որ գումար հասնի, մենք էլ ապրենք։ Մենք աշխատելով բոլոր հարկերը, բոլոր վճարումները կատարել ենք։ Վարձով ենք ապրում, երեխաներ ունենք։ Խնդիրներ չենք ուզում առաջացնել իշխանության համար։ Այդ գումարը որ ստանանք՝ օրվա հացի փող է»։

Վարորդներից մեկն ասաց, որ ստեղծված պայմանները ստեղծում են հանցագործություն կատարելու համար. «Մնացել է ապերացիա անեմ, հղիանամ, որ փող ստանամ։ Բա ինչ անեմ, բոլորին հատկացնում են, շոֆերն էլ գլոբուսից դուրս է։ Ընտանիքում միայն ես եմ աշխատում, հիմա ո՞նց պահեմ ընտանիքս։ Մնացել է 6-րդ հարկից էդ երեխեքին ներքև գցեմ։ Հիմա որ հարկադրված պարապուրդ է, ես դրանում ի՞նչ մեղավոր եմ։ Բոլորս դիվանի քշող ենք դարձել։ Գնանք հանցագործություն անենք»։

Բողոքողներից մեկը շեշտեց, որ տանը երեխաներ ունի, ինքն էլ տան միակ աշխատողն է.

«Լավ մենք համբերենք, բա երեխային ինչպես ասեմ՝ համբերի. հաց չտա՞մ։ Երեխաս կաթ է ուտում մեկ տարեկան է, դեղատնից եմ գնում կաթը, հիմա ես որ չեմ աշխատում ինչպե՞ս առնեմ։ Մարդն ի վիճակի էլ չի տնից դուրս գալու։ Հարգելի պարոն Փաշինյան, հարգելի պարետ Ավինյան, այդ օրենքներն այնպես կազմեք, որ բոլորին հասանելի լինեն։ Ստամոսքը չի հարցնում՝ որ կետին ես համապատասխանում, սոված է»։

Լրագրողների հետ զրույցում Մուատ ՍՊԸ-ի ղեկավար Կարեն Բեգլարյանն ասաց, որ դիմել են և՛ Երևանի քաղաքապետարանին, և՛ Կառավարությանը և՛ ՀՀ պարետին, սակայն որևէ պատասխան դեռևս չեն ստացել.

«Դիմել ենք Երևանի քաղաքապետարանին, Կառավարությանը, սակայն որևէ պատասխան չենք ստացել։ Մենք դիմել ենք դեռևս այն օրերին, երբ տրանսպորտի գործունեությունը չէին կանգնեցրել։ Այս քաղաքացիները 11 ծրագրերից որևէ մեկին չեն համապատասխանում, այստեղ արդեն կյանքի ու մահվան հարց կա։ Կամ պետք է աշխատանք տրամադրել կամ որևէ գումար տալ։ Փետրվար ամսից դիմում ունենք գրած պատկան մարմիններին։ Եթե նույնիսկ վաղն ասեն՝ աշխատում եք, ապա այս մասնավոր ընկերությունները պայթում են արդեն։ Մեր հաշվին 15 օր աշխատել ենք։ Ուղևորահոսքն այնքան էր նվազել, որ վառելիքի գումար չկար»։