Հիշեցում. Ովքեր են հանդիսանում Կորոնավիրուսի հետևանքների չեզոքացման սոցիալական ծրագրերի շահառուներ, իսկ ում դրանք չեն վերաբերում

Ինչպես արդեն նշել էինք, Operativ լրատվականը բազմաթիվ ահազանգեր է ստանում իր ընթերցողներից, ովքեր բորբոքված ասում են, որ չեն հանդիսանում Կորոնավիրուսի հետևանքների չեզոքացման սոցիալական ծրագրերի շահառուներ և հարց են բարձրացնում, թե ինչ է լինելու, ինչպես են լուծելու իրենց հացի խնդիրը, չէ՞ որ մինչ համաճարակը աշխատել են, բայց հիմա, ըստ էության տվյալ ծրագրերից չեն կարող օգտվել:

Operativ լրատվականը անդրադարձել էր մի բնակչուհու բողոքի, ով ասում էր, որ կանգնած է դրսում հայտնվելու վտանգի առջև:

Operativ լրատվականի թղթակիցը զրուցել է Աշխատանքի Եվ Սոցիալական Հարցերի նախարարության մամլո քարտուղար Սոնա Մարտիրոսյանի հետ` ևս մեկ անգամ ճշտելու, թե ովքեր են հանդիսանում վերը նշված ծրագրերի շահառուներ:

Մենք հարց ուղղեցինք մամուլի քարտուղարին, արդյոք այն աշխատող քաղաքացիները, ովքեր ինչ-ինչ (շատ անգամ գործատուների) պատճառով գրանցված չեն եղել, որպես տվյալ կառույցների աշխատակիցներ, կարող են օգտվել այս ծրագրերից, եթե Կորոնավիրուսի համաճարակով պայմանավորված մատնվել են պարտադրված պարապուրդի, ինչին ի պատասխան Ս. Մարտիրոսյանն ասաց, որ փաստացի չգրանցված աշխատողը համարվում է չաշխատող քաղաքացի, և քանի որ նա հաշվառված չէ որևէ ընկերությունում որպես աշխատակից, բնական է, որ նրան չեն կարող վերաբերել այս ծրագրերը:

Մամլո քարտուղարը հատկանշական համարեց, որ հաստատության mlsa.am կայքում շատ կարևոր է մանրամասն ուսումնասիրել հետևյալ ինֆորմացիան:

Կորոնավիրուսի հետևանքների չեզոքացման սոցիալական ծրագրերը
Հարցուպատասխան՝ կորոնավիրուսի տնտեսական հետևանքների
չեզոքացման իններորդ միջոցառման մասին

1. Ո՞ւմ է վերաբերում Կառավարության այս որոշումը:

Այս որոշմամբ, միջոցառման շահառու են հանդիսանում բոլոր այն ընտանիքները, որոնք ունեն մինչև 18 տարեկան երեխա, որի երկու ծնողները կամ միայնակ ծնողը չեն ունեցել գրանցված աշխատանք՝ 2020 թ. մարտի 12-ի դրությամբ և չեն ընդունվել ժամանակավոր կամ մշտական գրանցված աշխատանքի 2020 թ. մարտի 12-ից մինչև 2020 թ. մարտի 31-ը ընկած ժամանակահատվածում:

2. Ո՞ւմ է տրվում այս աջակցությունը:

Ծրագրում ընդգրկված ընտանիքը կարող է աջակցություն ստանալ, եթե մինչև 18 տարեկան երեխաները (կամ միակ երեխան) և նրա ծնողները (կամ միայնակ ծնողը) մշտապես բնակվում են Հայաստանում և 2020 թ. մարտի 12-ից մինչև մարտի 31-ը ընկած ժամանակահատվածում երեխան և ծնողներից առնվազն գտնվել են Հայաստանում:

3.Կա՞ն արդյոք բացառություններ, ովքեր չեն կարող ընդգրկվել այս ծրագրում:

Ուշադրություն. ընտանիքը չի կարող աջակցություն ստանալ այն դեպքում, եթե երեխայի ծնողները կամ ծնողներից մեկը 2020 թ. հունվարի 1-ից մինչև 2020 թ. մարտի 1-ը ընկած ժամանակահատվածում ունեցել է գրանցված հիմնական կամ ժամանակավոր աշխատանք և այդ ժամանակահատվածում ծնողների միջին ամսական աշխատավարձի հանրագումարը կամ ծնողներից մեկի միջին ամսական աշխատավարձի չափը գերազանցել է 500 000 դրամը:

Աջակցություն չի կարող ստանալ նաև այն երեխայի ընտանիքը, որը 2020 թ. մարտի 12-ի դրությամբ հաշվառված է եղել ընտա­նիքների անապահովության գնահատման համակարգում կամ ընտանիքի անապահովու­թյան միավորը բարձր է 28.01-ից:

Շահառու չեն կարող դառնալ նաև այն երեխայի ծնողները կամ ծնողներից մեկը, ովքեր 2020 թ. մարտի 31-ի դրությամբ հանդիսացել է անհատ ձեռնարկատեր, ում գործունեությունը նույն ամսաթվի դրությամբ ՀՀ օրենսդրությամբ սահմանված կարգով դադարեցված չի եղել:

4. Կարող են արդյոք նախորդ ծրագրերի շահառուները ևս ընդգրկվել այս ծրագրում:

Այո, կարող են: Եթե շահառուն համապատասխանում է ՀՀ կառավարության կողմից հաստատված աջակցության ծրագրերից մի քանիսով սահմանված չափորոշիչներին, պետք է ընտրի դրանցից որևէ մեկը՝ օրինակ՝ այն, որի շրջանակներում ստացվող աջակցությունն առավել մեծ է:

5. Ի՞նչ ժամանակահատվածի համար է նախատեսված այս աջակցությունը:

Աջակցությունը տրամադրվում է միանվագ, այսինքն՝ մեկ անգամ, ընտանիքում առկա յուրաքանչյուր երեխայի համար՝ 26 500-ական դրամ գումարի չափով:

6. Ե՞րբ և ինչպե՞ս կարող եմ դիմել՝ աջակցություն ստանալու համար:

Այս միջոցառման շրջանակներում աջակցություն ստանալու համար ընթացակարգ դեռևս սահմանված չէ: Ուստի՝ այս պահին դիմել պետք չէ: Կարգը հաստատելու վերաբերյալ ՀՀ կառավարության որոշումը պատրաստ կլինի 2020 թ.-ի ապրիլի 9-ին, ինչից հետո միայն կընդունվեն դիմումներ:

Աջակցությունը տրամադրվում է ծնողներից մեկի կողմից online.ssa.am կայքին սահմանված կարգով էլեկտրոնային եղանակով ներկայացրած դիմումի հիման վրա:

7. Արդյոք իմ անձնական տվյալները հրապարակվելո՞ւ են:

Այո, միջոցառման շրջանակներում աջակցություն ստացած ընտանիքների տվյալները հրապարակվում են ՀՀ աշխատանքի և սոցիալական հարցերի նախարարության պաշտոնական կայքում: Լրացնելով աջակցություն ստանալու համար սահմանված դիմումը՝ Դուք համաձայնություն եք տալիս Ձեր տվյալների հրապարակման համար:

ՀՀ կառավարության 02.04.2020 թ.-ի թիվ 427 – Լ որոշումը կորոնավիրուսի տնտեսական հետևանքների չեզոքացման իններորդ միջոցառումը հաստատելու մասին

Հիշեցնենք նաև, որ ՀՀ աշխատանքի և սոցիալական հարցերի նախարարությունը գործարկել է նոր թեժ գիծ՝ 011 300 114 հեռախոսահամարով: