Ոչ մի երկիր կամ ընկերություն 5G-ի մենաշնորհ չի ունենա

Ոչ մի երկիր կամ ընկերություն չի ունենա մենաշնորհ բջջային ինտերնետի հաջորդ սերնդի հանդեպ։ Այս մասին ասել է Cisco գլոբալ ներդրումների փոխնախագահ եւ տնօրեն Գայ Դիդրիչը։

«Ոչ մի երկիր, ոչ մի ընկերություն, ոչ մի մայրցամաք չի տնօրինի 5G-ն»,- ասել է նա։

5G-ն բջջային ցանցերի հաջորդ սերնդի անվանումն է, որոնք պետք է ապահովեն տվյալների փոխանցման գերարագություն, թեեւ աշխարհի մեծ մասը դեռեւս աշխատում է 4G ցանցում։ 5G-ի վերաբերյալ բանավեճը կամ, ավելի կոնկրետ, բանավեճը 5G տեխնոլոգիաների մատակարարների մասին, դարձել է քաղաքականացված այն բանից հետո, երբ ԱՄՆ-ը եւ Մեծ Բրիտանիան մտահոգություն հայտնեցին, թե այնպիսի ընկերություններ, ինչպիսին չինական Huawei-ն է, կարող են անվտանգության համար սպառնալիք ներկայացնել։

Իր կողմից՝ Huawei-ը կտրականապես հերքում է նման մեղադրանքները։

Դիդրիչը, որը Cisco-ի «Country Digital Acceleration» անվանմամբ ծրագրի կառավարիչն է, որը ներկայում աշխատում է 31 երկրի հետ, որպեսզի օգնի նրանց «թվայնացվել ավելի արագ», ասել է, որ նրանցից միայն քչերն են սկսել մտածել 5G-ի մասին։

«Մենք միայն նոր ենք սկսում տեսնել, թե ինչպես են նրանք հետաքրքրություն ցուցաբերում ինտերնետի հանդեպ եւ որոշ ներդրումներ են անում 5G-ում։ Բանն այն է, որ դա իսկապես մրցավազք է, ես չեմ ցանկանում, որպեսզի մենք մտածենք այդ մասին ինչպես սպրինտի մասին։ Դա ավելի շուտ մարաթոն է, եւ մենք գտնվում ենք այդ մարաթոնի առաջին փուլերում»,- ասել է նա։

«Ես համագործակցում եմ աշխարհի այդ 31 երկրների եւ նրանց առաջնորդների հետ։ Մենք ունենք Nokia, ունենք Ericsson, Cisco-ի 60 հազար գործընկեր ամբողջ աշխարհում, որոնց հետ աշխատում ենք, եւ որպեսզի 5G-ն դառնա իրականություն, գործընկերների մեծ թվաքանակ կպահանջվի»,- ասել է նա։

Դիդրիչի խոսքով՝ տեխնիկական տարածքում կան մի շարք այլ նորարարություններ, ինչպիսին են իրերի ինտերնետը (փոխկապակցված սարքերի համակարգ) եւ Wi-Fi հաջորդ սերունդը, որը հայտնի է որպես Wi-Fi 6։

Նրա խոսքով՝ անվտանգության հիմնական խնդիրը անվտանգության պրովայդերների քանակն է, որոնք կան յուրաքանչյուր երկրում։ «Եթե դուք 30-50 կամ 70 անվտանգության պրովայդեր ունեք, որոնք ունեն շատ ընկերություններ եւ երկրներ, նրանք չեն շփվում միմյանց հետ, նրանք վատ են ինտեգրվում։ Եվ այսպես, ի՞նչ են անում վատ տղաները՝ նրանք փնտրում են թույլ օղակը անվտանգության այդ շղթայում, օգտագործում են այն եւ աշխատում դրա հետ։ Սյդպիսով խոսքը ավելի շատ անվտանգության համապարփակ ռազմավարության մշակման եւ ապահովման մասին է, որպեսզի անվտանգությունը ներկառուցվի ցանցում, ինչը ես կարեւոր եմ համարում»։

Նա նշել է, որ առեւտրային պատերազմը ԱՄՆ-ի եւ Չինաստանի միջեւ զսպում է 5G-ի համար արվելիք ներդրումները։ «Առեւտրային պատերազմները ոչ մեկին պետք չեն, եւ դա կրկին սահմանափակում է երկրների ու ընկերությունների՝ թվայնացման համար փող ծախսելու կարողությունը»։