32-ամյա բրիտանացին իրեն «զոմբի» է զգում հազվագյուտ հիվանդության պատճառով
32-ամյա բրիտանացին իրեն «զոմբի» է զգում և այդպիսի տեսք ունի հազվագյուտ հիվանդության պատճառով, որի հետևանքով դեմքին և մարմնի տարբեր մասերին առաջանում են ցավոտ, թարախային խոցեր, փոխանցում է Fox News-ը:
Սթիվ Յանգին ախտորոշել են փտախտային պիոդերմիա (PG): Յանգը հիվանդության պատճառով աշխատանքից ազատվել է եւ 2 անգամ փորձել ինքնասպան լինել: Նա չի ցանկանում տանից դուրս գալ անցորդների սեւեռուն հայացքների եւ մեկնաբանությունների պատճառով:
«Սա ամբողջությամբ կործանել է իմ կյանքը, սեփական տանս մեջ ինձ բանտարկյալ եմ զգում: Ես զոմբիի տեսք ունեմ: Սա ամենաուժգին ցավն է, որ իմ կյանքում երբեւէ զգացել եմ, ասես ինչ-որ մեկը մշտապես դանակը խրում է մարմնիս տարբեր մասերի մեջ»,- ասում է նա:
Հազվագյուտ հիվանդությունների ազգային կազմակերպության տվյալներով՝ փտախտային պիոդերմիան մաշկի հազվադեպ բորբոքային հիվանդություն է, որն ախտահարում է ԱՄՆ-ում 100 հազար մարդուց գրեթե մեկին: Փտախտային պիոդերմիայի ժամանակ առաջանում են կարմիր ելունդներ եւ բշտիկներ, որոնք վերջնարդյունքում վերածվում են ուռած բաց վերքերի:
Հիվանդության պատճառը հայտնի չէ, բայց նրանց շրջանում, ովքեր առողջական խնդիրներ ունեն, հատկապես աուտոիմունային խանգարումներ, օրինակ՝ աղիների բորբոքային հիվանդություններ, այս հիվանդության զարգացման հավանականությունն ավելի մեծ է:
Յանգն առաջին անգամ 2017 թվականի դեկտեմբերին է նկատել, որ դեմքին փոքրիկ խոցեր են առաջացել, մինչ ախտորոշում կատարելը անցել է մի քանի ամիս: Այս ընթացքում շարունակել են խոցեր առաջանալ դեմքին, կրծքին, թեւերին եւ չեն անցել, չնայած հակաբիոտիկներով տարբեր տեսակի բուժումներին:
Այս հիվանդության բուժումը հնարավոր է: Փտախտային պիոդերմիայի վերահսկման համար հաճախ են օգտագործվում տարբեր դեղամիջոցներ՝ ինչպես կորտիկոստերոիդներ եւ ստերոիդապահպանող պատրաստուկներ, բայց նույնիսկ բուժման դեպքում նոր խոցերը, միեւնույն է, առաջանում են:
«Ես փորձարկել եմ դեղերի բոլոր տեսակները ու, կարծես, ոչ մի բան չի օգնում»,- ասել է Յանգը՝ նշելով, որ ստերոիդներ ընդունելու պատճառով գիրացել է: