Կյանքումս որևէ հանքարդյունաբերական կազմակերպության համար չեմ աշխատել. Էրիկ Գրիգորյան

Կյանքումս որևէ հանքարդյունաբերական կազմակերպության համար չեմ աշխատել, չնայած վերջին 10 տարիներին շատ շատերից առաջարկներ եմ ստացել շատ մեծ հնարավորություններով և աշխատավարձերով: Այս մասին, այսօր՝ հոկտեմբերի 17-ին, կառավարության նիստից հետո լրագրողների հետ զրույցում նշեց Շրջակա միջավայրի նախարար Էրիկ Գրիգորյանը:

«Տարիներ առաջ աշխատել են Բրիտանական մի խորհրդատվական կազմակերպության համար, որն աշխարհի լավագույն խորհրդատվական կազմակերպություններից մեկն է, աշխատում է մոտ 80 երկրներում: Իրենց վերլուծությունների ժամանակ եղել են նաեւ վերլուծություններ, որ արել եմ «Լիդիանի» համար, Զանգեզուրի համար, Ագարակի համար: Բայց երբեւիցե որեւէ կերպ ես որեւէ պարտավորություն չեմ ունեցել: Դա եղել է 2014-2015 թվականներին, իսկ ես 2011-2017 թվականներին պետական համակարգում չեմ եղել, եղել եմ միջազգային փորձագետ, աշխատել եմ նաեւ Համաշխարհային բանկում»,-ասաց նա:

Պատասխանելով լրագրողների հարցին, թե արդյոք ի վերջո Ամուլսարի հետ կապված նոր ՇՄԱԳ-ի անհրաժեշտություն կա՞, նախարարն ասաց.

«Մենք ուսումնասիրել ենք «Էլարդի» տվյալները, նաև հարցումներ ենք ուղարկել մի շարք պետական մարմինների, օրինակ «Հիդրոմետ»-ին, որը տվել է տեղեկատվություն գոլորշիացման հետ կապված: Օրինակ, «Էլարդը» նշել է, որ կան խնդիրներ գոլորշիացման հետ կապված, գերագնահատված է գոլորշիացումը: «Հիդրոմետը» եւս ասել է, որ գոլորշիացումը 3 անգամ ավել է ներկայացված եղել: Հիմա այնտեղ կան տվյալներ, որոնք պետք է ուսումնասիրվի Քննչական կոմիտեում հարուցված քրգործի շրջանակներում, այն վերլուծությունը, որ մենք ուղարկել ենք վարչապետի աշխատակազմ: Այնտեղ կա որոշակի առաջարկություն նախագծի որոշակի փոփոխության վերաբերյալ: Մենք 12 կետով ներկայացրել ենք մեր մտահոգությունները, այն անհամապատասխանությունները, որոնք գտել ենք «Էլարդի» եզրակացության եւ Ակադեմիայի աշխատանքների հիման վրա: Այսինքն, թե ես ցանկանում եմ, չեմ ցանկանում, ընդհանրապես, ոնց եմ նայում, էական չէ»:

Նա նաեւ հավելեց. «Եթե ներկայացրել ենք այդ փաստաթուղթը, նշանակում է, որ այդ փաստերը առնվազն ստուգման, ուսումնասիրման, պարզաբանման կարիք ունեն»: