Բարեգործության հիմնական սկզբունքը պետք է լինի՝ մի՛ վնասիր. «Իմ քայլը» հիմնադրամի տնօրեն
Անցյալ տարի հունիսին վարչապետ Նիկոլ Փաշինյանի տիկնոջ՝ Աննա Հակոբյանի կողմից ստեղծվեց «Իմ քայլ» հիմադրամը: Հիմնադրամի առաքելություններից է առողջ, կիրթ և ներառական հասարակություն ստեղծել:
Որո՞նք են այն գործիքակազմը և ռեսուրսները, որոնց միջոցով հիմնադրամը կլուծի առկա խնդիրը: «Առաջին լրատվական»-ի հետ զրույցում «Իմ քայլը» հիմնադրամի տնօրեն Հովհաննես Ղազարյանը նշեց. «Կան ծրագրեր, որոնք մենք ենք մշակում և իրականացնում, կան ծրագրեր, որոնք նախկինում եղել են և այսօր հարկ կա շարունակել, ինչպես նաև կան ծրագրեր, որտեղ մենք կամուրջ ենք հանդիսանում գաղափարի, ռեսուրսի և իրականացման միջև: Մեզ համար որպես սկզբունք ենք որդեգրել երկարաժամկետ ծրագրեր իրականացնել, այսինքն՝ այն աջակցությունը, որ մենք ցուցաբերում ենք, պետք է ունենա երկարաժամկետ ազդեցություն ունենալու խոստում: Օրինակ՝ մենք ունենք աղքատության հաղթահարման ծրագիր, որն իրականացնում ենք «Վորլդ Վիժն Հայաստան» կազմակերպության հետ: Մենք յուրաքանչյուր ընտանիքի անհատական մոտեցում ենք ցուցաբերում, ուսումնասիրում ենք կարիքները, որտեղ կարևորագույն պայման է աշխատունակությունը և համակողմանի աջակցության միջոցով տալ այն գործիքակազմը, որը որոշակի ժամանակ հետո հնարավորություն կտա դուրս գալ այդ վիճակից… Ցուցաբերվում է նաև հոգեբանի աջակցություն, ուսուցանվում են գիտելիքներ, թե ինչպես կարելի է արդյունավետ կառավարել ընտանիքի բյուջեն, աջակցում ենք աշխատանք գտնել և կայուն եկամուտներ ապահովելով ընտանիքի համար՝ դառնալ ինքնաբավ»:
Հովհաննես Ղազարյանի հավաստմամբ, ցավոք, կան որոշ ընտանիքներ, որոնք ապրում են աղքատության մշակույթով. «Այնտեղ սովորել են դիմել տարբեր կազմակերպությունների և ստանալ կարճաժամկետ աջակցություն: Բայց մենք կարծում ենք, որ հրատապ խնդիրներ լուծելով՝ միևնույն ժամանակ պետք է հնարավորություններ ստեղծել, որպեսզի ընտանիքը կարողանա ապահովել իր բարեկեցությունը: Աղքատության հաղթահարման այլ փիլիսոփայություն դժվար է գտնել. հիմնական շեշտը պետք է դրվի ընտանիքի, կոնկրետ անհատների ներուժը սեփական բարեկեցությունն ապահովելու նպատակով օգտագործելու վրա:
«Իմ քայլ» հիմադրամի տնօրենը նաև ընդգծեց, որ բարեգերծություն հիմնական սկզբունքը պետք է լինի՝ «մի ՛վնասիր»:
Մանրամասն՝ տեսանյութում: