на Русском
Արարատ Միրզոյանը և Հունգարիայի Ազգային ժողովի... 
Վթար՝ Խորենացու փողոցում․ տուժածներին հիվանդա... 
Պաղեստինյան կարգավորումը կարող է ակտիվացման հույս ձեռք բերել, երբ ձևավորվի իսրայելական կառավարությունը. Լավրով
Պաղեստինյան կարգավորումը կարող է ակտիվացման հույս ձեռք բերել, երբ ձևավորվի իսրայելական կառավարությունը: Այս մասին հայտարարել է Ռուսաստանի ԱԳ նախարար Սերգեյ Լավրովը, փոխանցում է ՏԱՍՍ-ը:
«Հիմա մենք կհետեւենք, թե ինչպես կավարտվի իսրայելական կառավարության ձեւավորումը: Այնտեղ տեղի են ունենում հետաքրքիր գործընթացներ: Լսել եմ, որ շփումներ կան «սպիտակ-երկնագույնների» միջեւ, Բենի Գանցի եւ «Միավորված արաբական ցուցակի», այդ թվում՝ նաեւ հնարավոր համարելով այս ձեւաչափում համագործակցությունը կրոնական հրեական կուսակցությունների հետ: Սրանք հետաքրքիր գործընթացներ են»,- ասել է նա:
«Որքանով հասկանում եմ, եթե կոալիցիային մասնակցի «Միավորված արաբական ցուցակը», ապա միայն սա լավ ազդանշան կլինի, որ կարելի է վերականգնել պաղեստինա-իսրայելական բանակցությունները, եւ արդեն հարցերը լուծել ՄԱԿ Անվտանգության խորհրդի բանաձեւերի հիման վրա, բայց հաշվի առնելով այն փոփոխությունները, որոնք տարածաշրջանում տեղի են ունեցել այն բանից հետո, երբ այդ բանաձեւերը բոլորի կողմից ընդունվել են: Եվ իհարկե, նրբերանգները լիուլի հնարավոր են»,- հավելել է ՌԴ ԱԳ նախարարը:
«Դարի գործարքի» մասին
Լավրովը հայտարարել է, որ ԱՄՆ-ի խոստացած պաղեստինա-իսրայելական կարգավորման «դարի գործարքն» ուղղված է խնդրի երկպետության լուծման սկզբունքից հրաժարվելուն:
«Մեզ հավաստիացնում են, որ ահա-ահա կհայտնվի տխրահռչակ «դարի գործարքը», որն արդեն 2 տարի է, ինչ բոլորիս խոստանում են,- նշել է նա: - Մինչեւ հիմա այն չկա, բայց մենք գրեթե հասկանում ենք, թե ինչի մասին է լինելու խոսքը: Խոսքը լինելու է երկպետության որոշումից հրաժարվելու մասին»:
ՌԴ ԱԳՆ ղեկավարը մտահոգություն է հայտնել «ռեւիզիոնիզմով, որը հիմա ԱՄՆ-ում դրսեւորվում է մերձավորարեւելյան կարգավորման, պաղեստինա-իսրայելական կարգավորման հարցերում»: «Երկպետության որոշումն, ըստ էության, մի կողմ է նետվում,- արձանագրել է նա: - Եվ այս հարցում մենք ամբողջ արաբական աշխարհի հետ միասին, ՄԱԿ բոլոր մնացյալ անդամների հետ հաստատուն կերպով կպաշտպանենք այն որոշումները, որոնք ընդունվել են ՄԱԿ ԱԽ-ում, ու որոնք պետք է կատարել»:
«Անկասկած, այս տարածաշրջանում անվտանգության այնպիսի ճարտարապետություն է հարկավոր, որն ինկլյուզիվ կլիներ»,- շեշտել է Լավրովը:
