Բողոքի ակցիաները սկսվել են կենտրոնական հրապարակից. մոտ 1 միլիոն իտալացի է մասնակցել կլիմայի պաշտպանության հարցով բողոքի ակցիաներին

Մոտ 1 միլիոն իտալացի, հիմնականում՝ դպրոցականներ եւ ուսանողներ, մասնակցել է կլիմայի պաշտպանության հարցով բողոքի ակցիաներին, որոնք անցկացվել են երկրի ավելի քան 160 քաղաքներում, հաղորդում է ՏԱՍՍ-ը՝ հղում անելով Rai News 24-ին:

Ըստ տեղեկությունների՝ Հռոմում փողոց է դուրս եկել ավելի քան 100 հազար ակտիվիստ, որոնց մտահոգում է համաշխարհային օվկիանոսի մակարդակի բարձրացման, միջին գլոբալ ջերմաստիճանի, սառույցների հալչման եւ կենսաբազմազանության նվազեցման թեմաները:

Բողոքի ակցիաները սկսվել են կենտրոնական հրապարակից, որտեղից մասնակիցները շարժվել են դեպի Մադոննա դի Լորետոյի հրապարակ, որտեղ կազմակերպիչները բեմ են տեղադրել:

Որոշ գնահատականների համաձայն՝ Միլանում նմանատիպ բողոքի ակցիաներին մասնակցել է մոտ 200 հազար մարդ: Ակտիվիստները Միլանի Դուոմո գոթական տաճարում այրել են Երկրի հատակագիծը: Տասնյակ հազարավոր ցուցարարներ են դուրս եկել Նեապոլի, Ֆլորենցիայի, Բոլոնիայի, Գենուայի, Թուրինի եւ այլ խոշոր իտալական քաղաքների փողոցներ:

Կլիմայի պաշտպանության հարցով բողոքի ակցիաներ են անցկացվում՝ ի պաշտպանություն Global Climate Strike միջազգային ակցիայի: Այդ ակցիաների դեմք է դարձել շվեդացի 16-ամյա դպրոցական Գրետա Թունբերգը: 2018-ին նա դպրոցական երթ է կազմակերպել: Հետագայում նրան միացել են ամբողջ աշխարհից դպրոցականներ եւ ուսանողներ:

Թունբերգը 2019-ի փետրվարին Փարիզում երթ էր կազմակերպել, որին միացել է մոտ հազար մարդ, նրան հաջողվել է 7,5 հազար մարդ հավաքել Բրյուսելում: Երկուշաբթի Թունբերգը էմոցիոնալ ելույթ է ունեցել Նյու Յորքում ՄԱԿ-ի կլիմայական գագաթնաժողովի շրջանակում՝ առաջատար պետություններին մեղադրելով մոլորակն անշրջելի կլիմայական փոփոխություններից պաշտպանելու հարցում ոչ բավարար ջանքեր գործադրելու մեջ: