Ոմանք փորձում են բռնության մշակույթը վերակենդանացնել. Նիկոլ Փաշինյանի հերթական հայտարարությունը «Քաղաքացիական պայմանագիր» կուսակցության համաժողովին

Այսօր, հունիսի 16-ին, համար 1 կարևորության լուրը շարունակում է մնալ «Քաղաքացիական պայմանագիր» կուսակցության համաժողովը, և դրանում հնչած հայտարարությունները, որոնցից շատերը գալիս են ամփոփելու, գուցե ևս մեկ անգամ գնահատականներ տալու երկրում վերջին ժամանակաշրջանում կատարված իրադարձություններին:

«Երրորդ կարևոր գաղափարական թեզը, որ կանխորոշում է «Քաղաքացիական պայմանագիր» կուսակցության քաղաքական ինքնությունը, արտահայտված է նրանում, որ պետք է մերժել բռնությունը, որպես ներհասարակական անձնային հարցերի կարգավորման եղանակ: Սա մեզ համար չափազանց կարևոր հարց է, Հայաստանում ավանդաբար բռնությունից զերծ գործելակերպին կասկածով են վերաբերվել: Այն ժամանակ, երբ մենք ասում էինք, որ Հայաստանում պատրաստվում ենք քաղաքական փոփոխություններ իրականացնել առանց բռնությունների, մեզ նորից մեղադրում էին ծախվածության, կոմֆորմիզմի և այս կարգգի զանազան մեղքերի մեջ: Մենք այս հարցում շատ սուր, այդ թվում հրապարակային բանավեճեր ենք ունեցել, քաղաքական կոնֆլիկտներ, բայց հիմա այդ բանավեճն ավարտվել է, որովհետև այն, ինչ ասում էինք, այդ ամենը արեցինք 100 տոկոսով, և Հայաստանում հաղթեց սիրո և համերաշխության հեղափոխությունը, Հայաստանում հաղթեց ոչ բռնի թավշյա ժողովրդական հեղափոխությունը»,- ասաց նա:

Փաշինյանի խոսքով` ժամանակ առ ժամանակ ոմանք Հայստանում փորձում են վերակենդանացնել բռնության ենթամշակույթը, որը մոտ 25 տարի իշխել է Հայաստանում:

«Քաղաքական հակառակորդների նկատմամբ բռնություն գործադրելը, անգամ քաղաքական հակառակորդներին կամ անհնազանդներին գնդակահարելը Հայաստանում կիրառվող պրակտիկա է եղել, բայց այս էջը նույնպես փակված պետք է համարենք այսօր, ոմանք փորձում են բռնության մշակույթը վերակենդանացնել՝ մեզ մեղադրելով մեղմության մեջ: Ոմանք փորձում են բռնության մշակույթը վերակենդանացնել՝ մեր բարեկրթությունը թուլություն համարելով, բայց հանրությունը, այո, ինքն իրեն բռնությունից պաշտպանելու իրավունք ունի և այդ պաշտպանության գործիքը պետք է դառնան իրավապահ մարմինները, քրեական օրենսգիրքը, անկախ դատարանները»,- ընդգծեց նա:

Փաշինյանը հավելեց, որ բռնության միջավայրում հնարավոր չէ մարդու երջանկությունը, հնարավոր չէ բարեկեցությունը, հնարավոր չէ նաև օրենքի և իրավունքի վրա հիմնված ազգային միասնությունը, որը նույնպես իրենց կուսակցության ծրագրի կարևորագույն դրությներից մեկն է:

Նշենք, որ «Քաղաքացիական պայմանագիր» կուսակցությունն այսօր՝ հունիսի 16-ին, անցկացնում է իր 5-րդ համաժողովը։ Համաժողովն ընտրելու է վարչության նոր կազմ, ընտրությունը կատարվելու է վարկանշային փակ քվեարկությամբ, առաջադրված 51 թեկնածուներից առավել ձայն հավաքած 21-ը կհամարվեն ընտրված։

Նշենք, որ նախատեսված է նաև վերահսկող հանձնաժողովի նոր կազմի ընտրություն։ Հանձնաժողովի 7 տեղերի համար առաջադրվել է 30 թեկնածու։