Առգրավվել են նախկին փոխնախարարին վաճառված գույքի փաստաթղթերը. գործարքն ուսումնասիրվում է

Քննչական կոմիտեն պետգույքի կառավարման կոմիտեից այսօր առգրավել է
Սպորտի և երիտասարդության հարցերի նախկին փոխնախարար Արսեն Քարամյանի ՀԿ-ին օտարված պետական գույքի գործարքի փաստաթղթերը:

Այս մասին «Հետք»-ին հայտնեց Պետգույքի կառավարման կոմիտեի նախագահի տեղակալ Սերգո Աթանեսյանը:

Գործարքին առնչվող փաստաթղթերն առգրավվել են, քանի որ Պետական գույքի
կառավարման կոմիտեն 2018 թվականի հոկտեմբերի 22-ին դիմել է Գլխավոր
դատախազություն՝ «ԵՊՀ շրջանավարտների միավորում» ՀԿ-ին օտարված պետական
գույքի գործարքում ենթադրյալ խախտումներ նկատելով: Հետագայում
դատախազությունն այդ նյութերն ուղարկել է Քննչական կոմիտե:
Մինչ դատախազություն դիմելը Պետգույքի կոմիտեն ուսումնասիրել է կատարված
գործարքը, դրան առնչվող փաստաթղթերն ու պարզել, որ 2017-ի դեկտեմբերի
28-ին Կառավարությունը «ԵՊՀ շրջանավարտների միավորում» ՀԿ-ին գույքն օտարել
է գնահատված արժեքի 0.72 %-ի չափով: Կոմիտեն նշել է, որ ՀԿ-ին օտարված
գույքի շուկայական արժեքը կազմել է 499 մլն դրամ, սակայն ՀԿ-ն վճարել է 50
մլն դրամ, ներառյալ հողամասի կադաստրային գինը՝ մոտ 47 մլն դրամ: «Այսպիսիով, 452 540 689 դրամ արժողությամբ գույքի վաճառքի գինը սահմանվել է 3 251 698 դրամ՝ գնահատված արժեքի 0.72 %»,- հայտնել է Պետգույքի կոմիտեն:

Դեպքի առթիվ հարուցվել է քրեական գործ՝  պաշտոնատար անձի կողմից
պաշտոնեական դիրքը ծառայության շահերին հակառակ օգտագործելու կամ
ծառայողական պարտականությունները չկատարելու հատկանիշներով:
Քրեական գործի շրջանակում հարցաքննվել են մի շարք անձինք: Վկայի
կարգավիճակով հարցաքննվել է նաև Արսեն Քարամյանը: Այս մասին «Հետք»-ին
հայտնել է Քննչական կոմիտեի դեպարտամենտի տեղեկատվության և
հասարակայնության հետ կապերի բաժնի պետ Նաիրա Հարությունյանը: Վերջինս
հավելեց նաև, որ այս պահին իրականացվում են քննչական և դատավարական
գործողություններ՝ դեպքի բազմակողմանի, լրիվ և օբյեկտիվ քննությունն
ապահովելու ուղղությամբ:

Ինչ խախտումներ են հայտնաբերվել նախարարի նախկին տեղակալին օտարված գույքի գործարքում Պետական գույքի կառավարման կոմիտեն դատախազությանը հայտնել է, որ
կառավարություն ներկայացված որոշման նախագիծը կազմվել և օտարումը կատարվել է
օրենսդրության պահանջների խախտմամբ: Մասնավորապես՝ որոշման դրույթները
թերի են, ներկայացված փաստաթղթերով չի հիմնավորվում, թե ինչու է ՀԿ-ին
գույքը օտարվել գնահատված արժեքի 0.72 տոկոսի չափով: Կոմիտեն ընդգծել է
նաև, որ գույքի օտարման պայմանները պետությանը ձեռնտու չեն:
Բացի այդ, Պետգույքի կառավարման կոմիտեն տեղեկացրել է, որ գույքի
օտարման որոշման և ՀԿ-ի հետ կնքված պայմանագրով գնորդը գույքն ըստ
նպատակային նշանակության օգտագործման որևէ պարտավորվածություն չունի, որի
պատճառով նա կարող է գույքը ոչ նպատակային օգտագործել, երրորդ անձին
օտարել՝ առանց պատասխանատվության ենթարկվելու:

Դեռևս 2017 թվականին ընդունված որոշմամբ՝ ՀԿ-ն Կառավարությանը խոստացել
էր, որ երիտասարդ մասնագետների համար բազմաբնակարան-բազմաֆունկցիոնալ շենք է կառուցելու:

Սակայն Պետական գույքի կառավարման կոմիտեն դատախազությանը հայտնել է, որ
 կառավարության որոշման նախագծի հիմք հանդիսացող դիմումին չի կցվել
ներդրումային ծրագիր, իսկ գույքի վաճառքի նպատակը նշված է միայն որպես
տեղեկություն:

Պետգույքի կառավարման կոմիտեի նախագահի տեղակալ Սերգո Աթանեսյանը
«Հետք»-ի հետ զրույցում նշեց, որ գործարքում խնդրահարույց է, թե գույքի գնի
նման զիջման դեպքում որպես փոխհատուցում կառավարությունն ինչ է
պահանջել:   

«Այսինքն՝ հանուն ինչի է գնահատված արժեքից այդքան նվազ գնով օտարվել
գույքը: Չկա ոչ մի ներդրումային հստակ պարտավորություն, ծրագիր, որը օրենքի
պահանջն է, որ նախապես գնորդն իր կողմից իրականացվող ծրագրի շրջանակում
պետք է իրականացնի: Նույնիսկ գույքը չի գրավադրվել: Դա նշանակում է՝
գնորդը, ով 499 մլն դրամանոց գույքը մոտ 3 մլն դրամով ձեռք է բերել, կարող է
մյուս օրը գույքը վաճառի գնահատվածին մոտ արժեքով»,- նշեց նախագահի
տեղակալը:

Սերգո Աթանեսյանը պնդում է՝ «ԵՊՀ շրջանավարտների միավորում» ՀԿ-ի հետ
կնքված գործարքը կառավարության համար չի կարող ձեռնտու համարվել և իրենց
համար մինչ օրս անհասկանալի է, թե հանուն ինչի է կառավարությունը ՀԿ-ին
այդքան ընդառաջել:

Ասում է՝ եթե կառավարությունը երիտասարդներին բնակարանով ապահովելու
ծրագրի նպատակով է նման գին սահմանել, կարող էր հիմնավորել փաստաթղթերով,
սակայն իրենց ունեցած փաստաթղթերի շրջանակում այդ տարբերակը չի
հիմնավորվում: Ըստ Աթանեսյանի՝ այն դիտարկումը, որ կառուցվող շենքի
բնակարանների գինը լինելու է շուկայականից ցածր գնով, առանց հստակ տվյալի
չի կարող արժանահավատ համարվել, քանի որ եթե 1 քմ-ը արժենալու է
շուկայականից 1000 դրամով ցածր, այն դեռևս մատչելի չէ:

Արսեն Քարամյանը ևս «Հետք»-ի հետ զրույցում պարզաբանեց օտարված գույքի գործարքն ու իրավապահների գործողությունները:
Քարամյանը պնդեց՝ իրենք բարեխիղճ ձեռքբերող են և գույքը գնել են
կառավարության համապատասխան որոշումով: Վերջինս Պետգույքի կառավարման
կոմիտեի նշած փաստարկները զավեշտ համարեց:

Դիտարկմանը, թե ՀԿ-ն չի ներկայացրել ներդրումային ծրագիր, Արսեն
Քարամյանը պատասխանեց՝ առաջին հերթին պետք է Պետգույքի կառավարման կոմիտեի
նախագահը պարզաբանի, թե ինչ ասել է ներդրումային ծրագիր: «Մենք բարեխիղճ
գնորդ ենք, և եթե Կառավարության համապատասխան որոշմամբ ձեռք ենք բերել
գույքը, իրականացնում ենք ծրագիր: Ե´վ մենք, և՛ մեր որևէ շահառու խնդիր չի
ունենալու»,- նշեց ՀԿ-ի նախագահը:

Նրա փոխանցմամբ՝ ընդհանուր առմամբ վեց մլրդ դրամի ներդրում է
կատարվելու, շինարարությունը մեկնարկել է 2018 թվականի ապրիլին, կավարտվի
2020 թվականի մայիսին:
Ինչպես է ստացվել, որ մինչ ներդրումային ծրագրի ավարտը օտարված գույքը
չի գրավադրվել: Քարամյանը հստակ պատասխան չտվեց, ասաց՝ եթե այդ գույքը
իրենց այլ գնով վաճառեին, չէին գնի. «Գնել էինք միայն այն պայմանով, որ
պետք է լինի հնարավոր մատչելիություն: Եթե ինչ-որ մեկի մտքով անցնում է, որ
այդպես չպետք է լիներ, ինքը շատ խորապես սխալվում է»:
Քարամյանի խոսքով` իրենք նշել էին, որ գույքի գնման համար «իրենց կարող
են թույլ տալ վճարել 50-55 մլն դրամ: Իսկ եթե գույքը վերագնահատվի այլ
արժեքով և իրենցից լրացուցիչ գումար պահանջվի, չեն վճարի, քանի որ այդ
միջոցները չունեն: ՀԿ-ի նախագահն ասում է, որ եթե ցանկանում են իրենց
սնանկացնել, բազմաթիվ ընտանիքների առանց բնակարան թողնել, թող անեն, այդ
պարագայում իրենք կընդունեն այդ մարտահրավերը՝ արժանի հարված հասցնելով:
Նախկին փոխնախարարը հերքեց, որ գույքի գնահատման նման ցածր արժեքում
ազդեցություն է ունեցել կառավարությունում իր երկարամյա պաշտոնն ու այն
հանգամանքը, որ ծրագիրն իրականացվել է այդ ժամանակ նախագահ Սերժ Սարգսյանի
հովանու ներքո: Նրա հավաստմամբ` մինչ որոշման ընդունումը նախագիծը
ներկայացվել է պետական մարմինների քննարկմանը, և Արդարադատության
նախարարությունը հաստատել է, որ այն համապատասխանում է օրենսդրական դաշտի
պահանջներին: «Եթե ինչ-որ մի հարգելի նոր նշանակվել է աշխատանքի, ինչ-որ
շուխուռ է ուզում անի, ինչ-որ բան է ցանկանում ցույց տալ, խորհուրդ չեմ տա
նման բան անել: Պատմությունն ու ժամանակը ամեն ինչ իր տեղն է դնելու»,-
նշեց Արսեն Քարամյանը:
Հիշեցնենք, որ կառավարությունը 2017 թվականի դեկտեմբերի 28-ին ուղղակի վաճառքի ձևով «ԵՊՀ շրջանավարտների միավորում» ՀԿ-ին օտարեց
Ազատության պողոտա 26/9 հասցեում գտնվող 961 քմ մակերեսով
շենք-շինություն, դրա սպասարկման և օգտագործման համար անհրաժեշտ 0.67 հա
մակերեսով հողամաս: