Եթե միջնորդներն ուզում են՝ կողմերն իսկապես զբաղվեն կարգավորմամբ, առաջին հերթին պետք է կարողանան կարգի հրավիրել Ադրբեջանին. վարչապետ

Ֆրանսիայի հայ համայնքի հետ հանդիպմանը վարչապետ Նիկոլ Փաշինյանը պատասխանեց ներկաների հարցերին:

Փաշինյանից հետաքրքրվեցին, թե ինչպես անցավ Ֆրանսիայի նախագահ Մակրոնի հետ հանդիպումը, արդյոք նա գոհ էր ՀՀ-ի հետհեղափոխական զարգացումներից:

Փաշինյանը նշեց, որ ինքը չի սիրում քննարկել ներքաղաքական զարգացումները: «Որովհետև ներքաղաքական զարգացումներից մենք պետք է գոհ կամ դժգոհ լինենք»,- ասաց նա:

Վարչապետը նշեց, որ քննարկել են երկկողմ հարաբերությունների հարցեր: «Այսօրվա հանդիպման ամենակարևոր արդյունքը կարող ենք համարել այն, որ առաջիկայում ՀՀ-ն ավելի լուրջ և ավելի մեծ դերակատարում պետք է ունենա, և մենք պետք է օգտվենք այդ իրավիճակից, որ թավշյա հեղափոխությունից ՀՀ–ի հեղինակությունը աճել է, և կարող ենք ավելի ակտիվ դերակատարություն ունենալ միջազգային կյանքում»,- ասաց նա:

Ներկաները հետաքրքրվեցին, թե արդյոք տնտեսական խնդիրներ արծարծվել են, և թե արդյոք Արցախի հարցով երկրի ղեկավարների նոր հանդիպումների հնարավորություն կա։

Նիկոլ Փաշինյանը նշեց, որ ԱԳ նախարարների մակարդակով հանդիպում արդեն կայացել է ՀՀ և Ադրբեջանի ԱԳ նախարարների միջև: «Իսկ երկրների ղեկավարների հանդիպման մասին դեռևս որևէ պայմանավորվածություն և խոսք չկա»,- ասաց նա:

Նիկոլ Փաշինյանն ասաց, որ նախագահ Մակրոնը հետաքրքրվում էր կարգավորման հարցում հայկական կողմի պատկերացումներով: «Նա մտածում էր՝ արդյոք կա հնարավորություն լրջորեն քննարկել Ղարաբաղյան հարցի կարգավորումը, մենք այս կապակցությամբ մտքեր փոխանակեցինք, և ես ասացի, որ իմ կարծիքով՝ Ադրբեջանի ղեկավարությունն այդքան էլ անկեղծ չէ ԼՂ հարցի կարգավորման մասին խոսելիս: Հակամարտության կարգավորում հնարավոր է տարածաշրջանում կարգավորման մթնոլորտում, բայց լսում ենք հոխորտանքներ, և կարգավորման մասին հարցը նման պայմաններում իրատեսական չէ»,- ասաց նա:

Ըստ ՀՀ վարչապետի՝ ինքը ասել է, որ եթե միջնորդներն ուզում են՝ կողմերն իսկապես զբաղվեն կարգավորմամբ, առաջին հերթին պետք է կարողանան կարգի հրավիրել Ադրբեջանին: «Եթե ոչ, եթե Ադրբեջանը մտածում է, որ ՀՀ-ին սպառնալիքներով կարող է հարցի լուծման մղել, սխալվում է: Ադրբեջանն էլ լավ չի արձանագրել, որ ՀՀ-ն հիմա ուրիշ է, մի Հայաստան է, որի շուրջ համախմբված է ողջ հայությունը՝ իր նոր ներուժով, և Ադրբեջանի ագրեսիվ գործողությունը չի լինելու ՀՀ-ի և Արցախի դեմ, այլ լինելու է ընդդեմ հայությանը և լինելու է հակահարված համախմբված և «դուխով» հայ ժողովրդից»,- ասաց նա: