Գործերը հետաձգելը վնասակար է առողջության համար

Քոլեջի հազարավոր ուսանողների շրջանում անցկացված հարցումը ցույց է տվել, որ գործերը հետաձգելը միայն անելիքների վրա չէ, որ վատ է անդրադառնում: Մարդիկ, ովքեր հատկապես հակված են հետաձգել անելիքները, կարող են ֆիզիկական եւ մտավոր խանգարումներ ունենալ:

Խնդիրների լուծումը մինչեւ վերջին պահը հետաձգելու ցանկությունը հավանաբար բոլորին է ծանոթ։ Որոշ ժամանակ առաջ գիտնականները ապացուցել են, որ գործերը չափից ավելի հետաձգելը կապված է վատ առողջական վիճակի եւ քնի որակի հետ: Սակայն, թե որն է պատճառը եւ որն է հետեւանքը, դեռեւս պարզ չէ։ Հնարավոր է, որ վատ ֆիզիկական վիճակը հանգեցնում է էներգիայի պակասի եւանելիքերը հետաձգելու ցանկության: Կամ, ընդհակառակը, հետաձգելու սովորությունը դժվարացնում է սպորտով զբաղվելը, առողջ ապրելակերպ վարելու փորձերը եւ ժամանակին բժիշկներին այցելելը։

Այս հարցին պատասխանելու համար շվեդ գիտնականները տեղի ուսանողների շրջանում ուսումնասիրություն են իրականացրել՝ երկար ժամանակ հետեւելով նրանց վիճակին եւ վարքագծին։ Դրա համար Շվեդիայի ութ համալսարաններից հավաքագրվել են 3525 կամավորներ՝ ֆիզիկական եւ հոգեկան առողջության վերաբերյալ մանրամասն հարցաթերթիկներ լրացնելու համար: Նրանցից 2587-ը մասնակցել են 9 ամիս անց անցկացված հարցմանը: Աշխատանքի արդյունքները ներկայացված են JAMA Network Open ամսագրում հրապարակված հոդվածում։

Հեղինակները մասնակիցներին բաժանել են երկու խմբի՝ հարցման առաջին փուլում բարձր կամ ցածր ձգձգման ցանկություններով: Երկրորդ փուլում առաջին խմբի մոտ դրսեւորվել է դեպրեսիայի, սթրեսի եւ անհանգստության ավելի ցայտուն ախտանշաններ, հայտնել են քնի վատ որակի, ձեռքերի հոդերի ցավերի եւ նույնիսկ ֆինանսական դժվարությունների մասին: Մյուս խմբում այս ախտանշաններն ավելի քիչ են տարածված եղել նույնիսկ տարիքի, սեռի, եկամուտի եւ այլ սոցիալ-հոգեբանական բնութագրերի հարմարեցումից հետո: