Օբաման տեխնոլոգիական ընկերություններին կոչ է արել վերջ տալ հասարակության պառակտմանը եւ ժողովրդավարության խարխլմանը

ԱՄՆ նախկին նախագահ Բարաք Օբաման տեխնոլոգիական ընկերություններին կոչ է արել վերջ տալ հասարակության պառակտմանը եւ ժողովրդավարության խարխլմանը, հայտնում է AFP-ն։

Նրա խոսքով՝ օնլայն հարթակները պարզել են, որ «հրահրող, բեւեռացնող քոնթենթը» գրավում է լսարանին այն փողերով, որոնք կարելի է վաստակել ժողովրդավարության միջոցով:

«Բանն այն է, որ ճշմարտության եւ ստի, համագործակցության եւ կոնֆլիկտի միջեւ մրցակցության մեջ այս հարթակների ձեւավորումը, կարծես թե, մեզ սխալ ուղղությամբ է տանում»,- ասել է Օբաման Սթենֆորդի կիբեր քաղաքականության կենտրոնի միջոցառման ժամանակ:

Օբաման կողմ է ԱՄՆ օրենքի փոփոխությանը, որը հայտնի է որպես Բաժին 230, որն ազատում է հարթակներին պատասխանատվությունից այն ամենի համար, ինչով օգտատերերը կիսվում են դրանցում:

«Այդ խոշոր հարթակները պետք է որոշակի հանրային վերահսկողության եւ կարգավորման ներքո գտնվեն,- ասել է Օբաման:- Մենք պետք է դիտարկենք Բաժին 230-ի բարեփոխումների հնարավորությունը՝ այդ փոփոխությունները կարգավորելու համար, այդ թվում՝ արդյո՞ք հարթակներից պետք է ավելի բարձր մակարդակի սպասարկում պահանջվի, երբ խոսքն իրենց կայքում գովազդի մասին է»:

Օբաման նշել է, որ տեխնոլոգիական ընկերությունների, օգտատերերի համայնքների եւ ոլորտի փորձագետների մասնակցությամբ ստեղծված կարգավորող կառույցը պետք է թույլ տա նրանց արդյունավետ աշխատել՝ միաժամանակ դանդաղեցնելով վնասակար քոնթենթի տարածումը համացանցում:

«Տեխնոլոգիական հարթակները պետք է խոստովանեն, որ իրենք եզակի դեր են խաղում այն ​​հարցում, թե ինչպես են մարդիկ օգտագործում տեղեկատվությունն ամբողջ աշխարհում, եւ որ նրանց որոշումներն ազդում են հասարակության բոլոր ասպեկտների վրա... Բացի այդ, տեխնոլոգիական ընկերությունները պետք է ավելի թափանցիկ լինեն իրենց գործունեության հարցում»:

«Մեզանից շատերի համար որոնման եւ սոցցանցերի հարթակները ոչ միայն մեր պատուհանն են դեպի համացանց, այլեւ նորությունների եւ տեղեկատվության մեր հիմնական աղբյուրն են,- ասել է Օբաման:- Ոչ ոք մեզ չի ասում, որ այդ պատուհանը լղոզված է, ենթակա է անտեսանելի աղավաղումների եւ նուրբ մանիպուլյացիաների: Համացանցը գործիք է: Սոցցանցերը գործիք են: Ի վերջո, գործիքները մեզ չեն կառավարում։ Մենք վերահսկում ենք դրանք, եւ կարող ենք դրանք վերափոխել»: