Փաշինյանը կասկածի տակ չի դնում Հայոց ցեղասպանությունը, դա մանիպուլացիա է. Հակոբ Ասլանյան

Երևի մի 20-25 տարի առաջ ես մի միտք ասեցի՝ կապված եղեռնի հետ, որ մենք պետք է հասկանանք, որ եղեռնը ոչ միայն մեր ցավն է, նաև մեր սխալը, և քանի դեռ մենք չենք գիտակցել այդ սխալի իրական արմատները, մենք չենք կարողանալու դուրս գալ այդ ողբերգական հոգեվիճակից: Այս մասին այսօր՝ ապրիլի 24-ին Ծիծեռնակաբերդի հուշահամալիրում NEWS.am-ի հետ զրույցում նշեց ԱԺ պատգամավոր, ՔՊ-ից հեռացված Հակոբ Ասլանյանը:

«Յուրաքանչյուր ողբերգություն, եթե դու չես բացահայտում նրա իրական պատճառները և չես հասկանում, թե ինչու է դա կատարվել, դու պատրաստ չես նորից թույլ չտալու այդ բոլորը: Դու շարունակ մնում ես այդ վիճակի մեջ։ Ես ուզում եմ, որ մեր ժողովուրդը հստակ գիտակցի, թե ինչ սխալներ են տեղի ունեցել 110 տարի առաջ և ինչու է ստացվել այդպես։ Դրանից հետո մենք նորովի կնայենք այս ամբողջ երևույթին»,-ասաց նա:

Անդրադառնալով նրան, որ Նիկոլ Փաշինյանին մեղադրում են Հայոց ցեղասպանությունը կասկածի տակ դնելու մեջ, Ասլանյանն ասաց. «Չկա այդպիսի բան, որ Նիկոլ Փաշինյանը կասկածի տակ է դնում, դա մանիպուլացիա է: Ես լավ լսել եմ իրեն, պետք չէ մանիպուլացնել, պետք է իրականության աչքերին նայել պարզ ձևով, որպեսզի պարզ արտահայտություն ունենաս:

Այո, մենք պետք է հասկանանք, թե այդ ցեղասպանությունը ինչու կատարվեց մեզ հետ։ Ինչու մենք պատրաստ չեղանք դրան։ 1909 թվականի Ադդանայի կոտորածներից մինչեւ 1915 թիվը վեց տարի անցել էր, ինչու՞ չնախապատրաստվեց հայ ժողովուրդը, ինչու՞ չհասկացավ, նրա քաղաքական ամբողջ էլիտան ինչու՞ չմտածեցին, ինչու՞ չհասկացան, թե որ երկրները ինչպիսի վերաբերմունք ունեն։

Նիկոլ Փաշինյանը գիտակից թե անգիտակից ձևով է ասում, չգիտեմ, բայց երբ որ ասում է վերանայել, ես վերանայելը այս ձև եմ հասկանում, որ այո, մենք պետք է վերանայենք մեր մոտեցումները, կեղծ հուզականությունից դուրս գանք, հասկանանք, որ այն ինչ կատարվել է մեր նախնիների հետ, բոլորս ենք մեղավոր»,:

Հարցին՝ կիսո՞ւմ է Նիկոլ Փաշինյանի «իրական Հայաստանի» գաղափարախոսությունը, մասնավորապես Արարատ լեռան հետ կապված, Ասլանյանը պատասխանեց. «Ոչ, չեմ կիսում, որովհետև չի կարելի հայրենիքը կիսել, հայրենիքը շարունակական է»: