Ոստիկաններն ու պարեկները կանխել են վրեժխնդրությունը․ բժիշկների շնորհիվ երեխաների կյանքին վտանգ չի սպառնում

Սեպտեմբերի 14-ին Արագածոտնի մարզի գյուղերից մեկում կանխվել է վրեժխնդրությունը «վենդետան»։

Ինչպես դեպքի վայրից հայտնում է ֆոտոլրագրող Գագիկ Շամշյանը, ժամը 16։15-ի սահմաններում ոստիկանության Արագածի բաժնում և ՀՀ ՆԳՆ ոստիկանության ՊԾ Արագածոտնի մարզի գումարտակում օպերատիվ տեղեկություններ են ստացվել, որ մարզի գյուղերից մեկում միջադեպ է տեղի ունեցել, որի ժամանակ անչափահասներ են տուժել։

Տեղում նույն գյուղի բնակիչ 39-ամյա Ա․ Ֆ․-ն ոստիկաններին հայտնել է, որ նույն օրը առավոտյան իր աղջկան 15-ամյա Կ․ Ս․-ին Գյումրի քաղաքում բնակվող քրոջ, 26-ամյա Հերիքնազ  Ֆ․-ի տանից բերելու կապակցությամբ իրենց միջև տեղի է ունեցել հեռախոսային վիճաբանություն, որի ընթացքում վերջինս սպառնացել է սպանել իրեն։ Արդեն Ժամը 16։00-ի սահմաններում Հ․ Ֆ․-ն տաքսիով եկել է գյուղ և մեքենայից իջնելով իր ձեռքի պայուսակից հանել է դանակ, որը նկատելով տան բակում գտնվող և Ա․ Ֆ․-ն և իր երեխաները, 11-ամյա  Ի․ Ս․-ն և 9-ամյա Ա․ Ֆ․-ն։ Իրենք  արագ տուն են անցել և փորձել փակել դուռը, սակայն հատակ մաքրելու փայտը մնացել է դռան տակ և այն ամբողջությամբ չի փակվել: Բաց մնացած հատվածից Հ․ Ֆ․-ն ձեռքը ներս է տարել և դանակով մարմնի տարբեր մասերում մարմնական վնասվածքներ պատճառել ներսի կողմից դուռը պահող Ա․ Ֆ․-ին, նրա երեխաներին Ի․ Ս․-ին և Գ․ Ս․-ին։ Այնուհետև Հ․ Ֆ․-ն լսելով, որ արդեն դեպքի մասին տեղյակ են ոստիկանությունում, իր եկած մեքենայով արագ հեռացել է:

Ֆոտոլրագրողը հայտնում է, որ օպերատիվ են գործել «Ծաղակահովիտ» բժշկական կենտրոնի շտապ օգնության բժիշկների հերթապահ խումբը և տեղում բժիշկն ու բժշկուհին օգնություն են ցուցաբերել վիրավոր երեխաներին, որոնց կյանքի այլևս վտանգ չի սպառնում։ 

Դեպքի մասին ոստիկանության Արագածի բաժնից տեղեկությունը փոխանցել են ՀՀ Քննչական կոմիտեի Արագածոտնի մարզային քննչական վարչության Ապարանի քննչական բաժին, որտեղից ժամանել է քննչական խումբը՝ բաժնի պետ Հրաչ Դավթյանի և օրվա պատասխանատու հերթապահ քննիչի գլխավորությամբ։ 

Դեպքի վայրի հարևանությամբ հավաքված մի քանի քաղաքացիներ, ովքեր հրաժարվեցին տեսախցիկի առաջ խոսել, նշում էին, որ եթե ոստիկաններն ու պարեկները օպերատիվ չժամանեին՝ հաստատ «վենդետա» էր տեղի ունենալու և շնորհիվ նրանց կանխվել է «վենդետան» և նաև շնորհիվ «Ծաղկահովիտ» բժշկական կենտրոնի բժշկի ու բժշկուհու երեխաների կյանքին այլևս վտանգ չի սպառնում։

Ոստիկանությունն ու քննչական բաժինը ձեռնարկվում են միջոցառումներ Հ․ Ֆ․-ին և հանցագործության գործիքը հայտնաբերելու ուղղությամբ: