Հանգուցավոր խպիպ․ բուժման մեթոդներ

Վահանաձև գեղձի հանգույցները պինդ կամ հեղուկով լցված գոյացություններ են, որոնք ձևավորվում են վահանաձև գեղձի ներսում:

Վահանաձև գեղձը փոքր ներզատական օրգան է, որը տեղակայված է պարանոցի հիմքում՝ կրծոսկրի անմիջապես վերևում:

Գեղձի հանգույցների մեծ մասը լուրջ խնդիր չէ և ախտանիշներ չի առաջացնում: Դրանց միայն փոքր տոկոսն է լինում քաղցկեղային, փոխանցում է Aysor.am-ը։

Հաճախ հիվանդը չի իմանում վահանաձև գեղձի հանգույցի մասին, քանի դեռ բժիշկը չի հայտնաբերել այն ստանդարտ բժշկական ստուգման արդյունքում: Հնարավոր է նաև, որ բժիշկը հայտնաբերի հանգույցն առողջական այլ խնդրի առիթով անցկացված պատկերային հետազոտությամբ: Այնուամենայնիվ, որոշ դեպքերում հանգույցները բավականին մեծանում են՝ դառնալով տեսանելի կամ առաջացնելով կլման ակտի կամ շնչառության դժվարություններ:

Բուժման տարբերակները կախված են վահանաձև գեղձի հանգույցի տեսակից:

Վահանաձև գեղձի հանգույցների մեծ մասը որևէ գանգատ կամ ախտանիշ չի առաջացնում:

Հազվադեպ որոշ հանգույցներ կարող են հասնել այնքան մեծ չափերի, որ՝

դառնան տեսանելի՝ որպես պարանոցի հիմքի այտուցվածություն,

ճնշեն շնչափողը կամ կերակրափողը՝ առաջացնելով դժվարաշնչություն կամ կլման դժվարացում:

Որոշ դեպքերում այս հանգույցներն արտադրում են լրացուցիչ թիրոքսին հորմոն, որն արտադրվում է վահանաձև գեղձում: Թիրոքսինի հավելյալ քանակությունը կարող է առաջացնել վահանաձև գեղձի հորմոնների գերարտադրության (թիրեոտոքսիկոզ կամ հիպերթիրեոդիզմ) ախտանիշներ, օրինակ՝

անբացատրելի քաշի կորուստ,

գերքրտնոտություն,

դող,

նյարդայնություն,

հաճախացած կամ անկանոն սրտազարկ:

Վահանաձև գեղձի հանգույցների միայն չնչին մասն է քաղցկեղային։ Այնուամենայնիվ, միայն ախտանիշների գնահատմամբ հնարավոր չէ պարզել հանգույցի տիպը:

Վահանաձև գեղձի քաղցկեղային հանգույցների մեծ մասն աճում է դանդաղորեն և բժշկի կողմից հայտնաբերելիս լինում է փոքր չափերի: Շատ ավելի հազվադեպ հանգույցների ագրեսիվ քաղցկեղները դրանք դարձնում են մեծ, պինդ, անշարժ և արագ աճող:

Թեև վահանաձև գեղձի հանգույցների մեծ մասը ոչ քաղցկեղային է և խնդիրներ չի առաջացնում, խնդրեք բժշկին, որ ստուգի պարանոցում առկա ցանկացած արտասովոր այտուցվածությունը, հատկապես, եթե ունեք շնչառության կամ կլման դժվարություն: Կարևոր է նաև, որ գնահատվի քաղցկեղի առաջացման հնարավորությունը:

Դիմեք բժշկին, եթե զարգացել են թիրեոտոքսիկոզի գանգատներ և ախտանիշներ, ինչպիսիք են՝

Սրտխփոց,

քնի դժվարացում,

մկանային թուլություն,

նյարդայնություն կամ գրգռվածություն:

Այցելեք բժշկին նաև այն դեպքերում, երբ ունեք վահանաձև գեղձի կողմից թիրեոիդ հորմոնների թերարտադրության գանգատներ և ախտանիշներ, ինչպիսիք են՝

մրսածության զգացողություն,

ավելի հեշտ հոգնածություն,

չոր մաշկ,

հիշողության խնդիրներ,

դեպրեսիա,

փորկապություն: