Հայտնաբերվել են ապօրինի զենք-զինամթերք

Մասիսի քրեական հետախույզները ստացել էին տեղեկութուն, որ Արբաթ գյուղի բնակիչ 28-ամյա երիտասարդը տանն ապօրինի պահում է զենք-զինամթերք: Տեղեկությունը ստուգելու նպատակով ապրիլի 1-ին ոստիկանները մեկնեցին Արբաթ:

Այս մասին հայտնում են ՆԳՆ ոստիկանությունից։

Տանտերը հայտնեց, որ տան նկուղում՝ պահածոների համար նախատեսված պահարանի վերնամասում պահում է զինամթերք, որը ժամկետային ծառայության ավարտին հետը բերել է դեռևս 2017 թվականին: Նրա 67-ամյա հայրը հայտնեց, որ ինքն էլ ունի ապօրինի զենք:

Փաստի առթիվ ապրիլի 1-ին Մասիսի քննչական բաժնում նախաձեռնվեց քրեական վարույթ, որի շրջանակներում որդին ներկայացրեց 75 փամփուշտ և պայթուցիկ նյութ, իսկ հայրը` սպորտային մեկնարկային մեկ ատրճանակ, ատրճանակի մեկ թմբուկ և որսորդական ողորկափող մեկ հրացան:

Հանգամանքները պարզվում են:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: