ԱՄՆ-ի ամենաթանկ տունը վաճառվում է 295 միլիոն դոլարով

Ֆինանսիստ Ջոն Դոնահյուի՝ Ֆլորիդայում գտնվող շքեղ կալվածքը վաճառքի է հանվել ապշեցուցիչ՝ 295 միլիոն դոլարով: Եթե այն ​​վաճառվի, կդառնա ԱՄՆ-ում վաճառված ամենաթանկ գույքը:

Ջոն Դոնահյուն 1980-ականներին անմարդաբնակ հողատարածք էր նկատել Մեքսիկական ծոցի երկայնքով: Նա ցույց էր տվել թերակղզու ուղղությամբ, որը հայտնի է որպես Գորդոն Փոյնթ, եւ իր կնոջը՝ Ռոդորա Դոնահյուին ասել էր. «Ես ուզում եմ գնալ այնտեղ»: Այնուհետեւ նա 1 միլիոն դոլար է վճարել 4,3 ակր տարածք ունեցող գույքի համար, որտեղ ոչինչ չկար, բացի ձկնորսական փոքրիկ տնակից:

Սա տեղի է ունեցել 1985թ-ին։ Ժամանակի ընթացքում նրանք մեծացրել են ոչ միայն իրենց ընտանիքի, այլեւ իրենց տան չափսերը: 4 ակրը դարձել է, մոտավորապես, 60 ակր, իսկ կենտրոնում ավելացել է հսկայական ծովափնյա «հանգստավայրը»՝ 13 երեխաներից եւ 84 թոռներից բաղկացած նրանց մեծ ընտանիքի համար:

Այս թանկարժեք անշարժ գույքը ներառում է 11,500 քառակուսի ոտնաչափ հիմնական բնակավայր, որը կառուցվել է, մոտավորապես, 1989 թվականին: Դրան կից կա նաեւ երկու տուն՝ կառուցված 1990 եւ 2013 թվականներին։ Կիվեյդին կղզու տարածքում ընտանիքը 2005 թվականին կառուցել է եւս մեկ տուն՝ 16000 քառակուսի ոտնաչափ տարածքով: 2019 թվականին այդ տունը վաճառվել էր ավելի քան 45 միլիոն դոլարով։

Աշխույժ կալվածքը հյուրընկալել է այնպիսի ազդեցիկ մարդկանց, իչպիսիք են՝ նախկին նախագահ Ջորջ Բուշը եւ նրա կինը՝ Բարբարան: «Այն սենյակը, որտեղ նրանք մնացել են, մենք անվանել ենք «Նախագահական լյուքս»»,-Wall Street Journal-ին տված բացառիկ հարցազրույցում պատմել է Բիլ Դոնահյուն:

Նրա խոսքով՝ ուրբաթ եւ շաբաթ օրերին 100-ից ավելի մարդ է հավաքվել տարածքում՝ տարբեր երեկույթների շրջանակում՝ Հելոուինի, Զատկի ձվերի որսի եւ շատ ուրիշ տոնակատարությունների համար:

«Ես վստահ եմ, որ եղել են բազմաթիվ դեպքեր, երբ յուրաքանչյուր սենյակի յուրաքանչյուր մահճակալ զբաղված է եղել»,-ասել է նա:

Տարածքը, որն ունի 1650 ոտնաչափ երկարությամբ ծովափ եւ մասնավոր նավահանգիստ, կարելի է վաճառքի հանել 295 միլիոն դոլարով, բայց այն կյանքը, որը նա առաջարկում էր իր սեփականատերերին, իսկապես անգին էր: