ԱԺ-ը՝ «մեր տունը», Ալեքսանյանների տան՝ Միստր և Միսիս Սմիթ իրավիճակը, Բադեյանի բենեֆիսը, ԱԺ լեզվակռիվները, Օմաբայի երջանիկ նկարը. ՖԲ-ն՝ երեկ

Սա Հայաստանն է այստեղ մենք տանն ենք: Օրվա խորհուրդ 

Ուզում եմ նախարարներին և պատգամավորներին հիշեցնեմ, որ ԱԺ-ն ոչ թե իրանց տունն է, այլ նրանք ընդամենը վարձակալ են, ու ժողովուրդն է նրանց թույլ տվել, որ ժամանակավորապես աշխատեն այնտեղ: Ստացվեց, որ երեկվա կռիվը, (սա իմ տունն է, բա նախկինում մերն էր) անհիմն էր, որովհետև ԱԺ-ն ժողովրդի տունն է: Այս գաղափարով շարժվեք, պարոնայք:

Մի շարք խոշոր գործատերեր, այդ թվում Սամվել Ալեքսանյանի կինը,  պատրաստվում են բարձրացնել կամ արդեն բարձրացրել են իրենց աշխատողների աշխատավարձները' այսպիսով օգնելով աշխատողներին, որ կուտակային կենսաթոշակի ծանրությունը չզգան: Այ ստեղ է, որ հայկականությունը առաջ է գալիս: Բա, որ կարող էիք բարձրացնել, ինչո՞ւ չէիք բարձրացնում, որ մարդիկ իրենց մի քիչ ավելի լավ զգային: Իսկ Սամվել Ալեքսանյանենց տունը լրիվ Միստր և Միսիս Սմիթ իրավիճակն է. ամուսինը կողմ է քվեարկում կենսաթոշակային ֆոնդին, կինը պայքարում է դրա դեմ:

Երեկ Մանվել Բադեյանի բենիֆիսն էր. չէ, մեծարելու իմաստով չէ, ուղղակի նրա մասին խոսում էին գրեթե բոլորը և նրանից հարցազրույց էին ցանկանում վերցնել էլի բոլորը: Բայց ինչպես բոլոր միջադեպերի ժամանակ մարդիկ կան, որ իրենց ուռկանները վերցնում են ու պղտոր ջրում սկսում են ձկնորսությամբ զբաղվել, կամ էլ մի լիտր յուղ են գտնում ու կրակի վրա յուղ են լցնում: Որքան տգեղ էր Բադեյանի արտահայտությունը, կրկնակի անգամ տգեղ է այդպիսի մարդկանց պահվածքը:

ԱԺ դահլիճից լեզվակռիվները աստիճանաբար տեղափոխվում են քաղաքապետարանի ավագանու ցուցակ: Ստյոպա Սաֆարյանը էս վերջերս շատ է կռիվների մեջ ընկնում: Հիմա էլ Հրանտ Թոխատյանի հետ կռվեց: Դե, ինչպես բոլոր կռիվներում, այս մեկը ևս իմաստ ունենալ չէր կարող, այդ պատճառով չեմ խոսի կռվի մասին: Հարգելիներս, Ձեզ է նայում մի ողջ ազգ' մի քիչ կոռեկտ եղեք: Եթե չեք կարողանում ձեզ տիրապետել' իջեք բեմից:

Երեկ մի հետաքրքիր լուսանկար էր տարածվում ՖԲ-ում' Օբամայի մասնակցությամբ: Օբաման իր տիկնոջ՝ Միշել Օբամայի հետ գնացել էր Հարավ Աֆրիկյան Հանրապետություն 'հարգելու Նելսոն Մանդելայի հիշատակը: Հարգեց բա չհարգեց, բերանը մինչև ականջները բացած նստած էր, իսկ Միշելը այնպիսի հայացքով էր նայում Օբամային, ոնց որ ասելուց լիներ. «Սպասի հասնենք Սպիտակ Տուն, տես ոնց եմ ականջներդ ձգելու»: Ես միայն մի բան կասեմ' Միշելը ավելի հզոր կադր է, քան աշխարհաքաղաքական դիրք չունեցող Օբաման:

Էդգար Խաչատրյան. Ֆեյսբուք