Բարիատրիկ վիրաբուժություն. ստամոքսի ծավալի փոքրացման գները Հայաստանի առաջատար կլինիկաներում

Բարիատրիկ վիրաբուժությունը ավելորդ քաշից ազատվելու և երկար ժամանակ այն պահպանելուն ուղղված արդյունավետ միջոցներից մեկն է:

Բարիատրիկ վիրաբուժությունը վիրահատության տեսակ է, որն ազդում է ստամոքսի և սննդի մարսողության վրա: Վիրահատության նպատակը ստամոքսի չափերը փոքրացնելն է, որի արդյունքում մարդը հագենում է` ավելի քիչ սնունդ ընդունելով:

Բարիատրիկ վիրահատության ամենահաճախ կիրառվող տեսակներն են ստամոքսի օղակավորումը, ստամոքսի շունտավորումը և ստամոքսի երկայնակի մասնահատումը:

Վիրահատությունները սովորաբար կատարվում են լապարոսկոպիկ եղանակով և որովայնի պատին կատարվում են մի քանի փոքր կտրվածքներ: Սակայն երբեմն անհրաժեշտ է լինում որովայնի պատին կատարել մեծ կտրվածք և անցնել «բաց» վիրահատության:

Ստամոքսի օղակավորում կամ բանդաժավորում (lap band surgery). Ստամոքսի վերին հատվածում տեղադրվում է սիլիկոնե նեղ շրջանակ, որի միջոցով ստամոքսը բաժանվում է երկու՝ փոքր և մեծ բաժինների։ Այս օղի շնորհիվ սնունդը երկար ժամանակ մնում է վերին փոքր ստամոքսում՝ առաջացնելով հագեցվածության զգացում և սնունդ ընդունելը դադարեցնելու կարիք։

Ստամոքսի շունտավորում (gastric bypass). Նպատակը ստամոքսի և բարակ աղիների փոքր մասը մարսողությունից «անջատելն» է, որի արդյունքում նվազում է սննդի ներծծումը: Վիրահատությամբ դարձյալ փոքր ստամոքս է ձևավորվում, սակայն, ի լրումն, բարակ աղիքի որոշ հատված «անջատվում է» մարսողությունից։ Արդյունքում ստամոքսով անցնող սնունդը միանգամից ընկնում է բարակ աղիքի հեռավոր հատվածներ, և միկրոէլեմնտները, շրջանցելով հաստ աղիքի 1,5 մետրը, օրգանիզմի մեջ չեն ներծծվում։

Ստամոքսի երկայնակի մասնահատում կամ թևքային գաստրոպլաստիկա (gastric sleeve surgery). Ստամոքսի մասնահատումն է՝ ստամոքսի գլխավոր հատվածի հեռացումը և ծավալի փոքրացումը․ ընդ որում, հեռացվում է ստամոքսի այն շրջանը, որտեղ արտադրվում է քաղցի զգացում առաջացնող հորմոնը:

Վիրահատվողների մեծ մասը սկսում է նիհարել միջամտությունից հետո՝ 1-2 տարվա ընթացքում, որից հետո քաշի կորուստը դադարում է: Ստամոքսի օղակավորման դեպքում այս ժամանակահատվածը տևում է ավելի երկար:

Բարիատրիկ վիրահատությունները սովորաբար առաջարկվում են խիստ գեր մարդկանց, երբ մարմնի զանգվածի ցուցանիշը մեծ է 40-ից կամ նրանց, ովքեր ունեն 35-ից մեծ ՄԶՑ և որևէ լուրջ քրոնիկ հիվանդություն, ինչպիսիք են սրտանոթային հիվանդությունները կամ շաքարային դիաբետը։

Բարիատրիկ վիրահատության տեսակը որոշվում է բազմաթիվ գործոններով, այդ թվում, թե ինչ չափի քաշի կորուստ եք ցանկանում ստանալ, ինչպիսի ուղեկցող հիվանդություններ կամ առողջական ռիսկեր ունեք:

Վիրաբույժը մանրակրկիտ կգնահատի այս հարցերը և կառաջարկի ձեր պահանջներին և առողջական վիճակին լավագույնս համապատասխանող տարբերակը:

Բարիատրիկ վիրահատության տարբեր տեսակներն ունեն տարբեր՝ առանձնահատուկ ռիսկեր: Այդ իսկ պատճառով առաջարկվող վիրահատական մեթոդի հնարավոր ռիսկերն ու վտանգներն անպայման պետք է քննարկել վիրաբույժի հետ:

Որոշ դեպքերում վիրահատված անձինք սկզբում կորցնում են իրենց մարմնի քաշը, որից հետո նրանց մարմինը սկսում է հարմարվել վիրահատությամբ կատարված փոփոխություններին, և նրանք կարող են կորցրած քաշի մի մասը կրկին վերականգնել, փոխանցում է Aysor.am-ը։