Արդյոք ճի՞շտ է լեզվի պարբերական մաքրումը հատուկ քերիչով կամ խոզանակով. մասնագետի կարծիքը

Լեզուն կարևոր օրգան է, որը կատարում է բազմաթիվ գործառույթներ. Այն ապահովում է զգայունություն տարբեր համերի նկատմամբ, օգնում է ծամելու և կուլ տալու գործընթացներին, ձևավորում խոսքի հնչյունները։

Aysor.am- ը զրուցել է քիթ-կոկորդ-ականջաբան Թինա Մինասյանի հետ՝ պարզելու արդյոք կարելի՞ է որոշ միջոցների գործադրմամբ մաքրել լեզուն, ի՞նչ հաճախականությամբ և ո՞ր դեպքերում։

«Մարդկանց մեծամասնությունը լեզուն մաքրող միջոցներ օգտագործելու կարիք չունի: Այժմ հաստատվել է, որ մաքրումը օգտակար է միայն հալիտոզ (բերանի տհաճ հոտ) ունեցող մարդկանց համար:

Հոտի առաջացումը կապված է անաէրոբ բակտերիաների գերակշռության հետ՝ դրանք կարող են ապրել ատամների, լեզվի և նույնիսկ նշագեղձերի վրա, որոնք ծծմբային միացություններ են արտազատում»,- ասաց բժիշկը:

Մասնագետի խոսքով, լեզվի մաքրում կարելի է կատարել ատամի սովորական փափուկ խոզանակով, իսկ հատուկ քերիչ օգտագործելու դեպքում զգուշանալ լեզվի մակերեսը վնասելուց:

Լեզուն մաքրելու ցանկությունը շատերի մոտ ունի մեկ այլ պատճառ՝ սպիտակ փառի առկայությունը. Ռեֆլեքսիվ հիվանդության դեպքում ստամոքսահյութը արտազատվում է կերակրափող և կոկորդ, որին արձագանքում է լորձաթաղանթը՝ փորձելով պաշտպանվել ավելի շատ լորձով։ Այս սննդարար միջավայրում մանրէները բազմանում են, որոնց միջոցով ձևավորվում է սպիտակ թաղանթ։

Կան նաև նորմայի տարբերակներ, որոնցում լեզուն փոքր-ինչ այլ տեսք ունի։ Օրինակ՝ ծալված լեզուն բնածին հատկանիշ է, որի դեպքում այն ունենում է բազմաթիվ իջվածքներ և ծալքեր: Սա վտանգավոր չէ, սակայն խորշերում կարող են կուտակվել մանրէաբանական նստվածքներ, և նման դեպքերում մաքրումը անհրաժեշտ է։ Նորմայի մեկ այլ տարբերակ «քարտեզանման» լեզուն է՝ ծածկված հստակ սահմաններով բծերով։ Այս բծերը մաքրելն հակացուցված է, քանի որ այն կարող է վնասել լորձաթաղանթը։

Թինա Մինասյանի կարծիքով՝ լեզուն մաքրեու գործընթացը սովորություն դարձնելը կարող է օգտակար լինել բերանի խոռոչի առողջության համար։

Խոսելով կանոնավոր հիգիենայի մասին, նա նշեց նաև, որ լեզվի մակերեսին կան պապիլներ, փորվածքներ, ակոսներ, որոնց մեջ խրվում են սննդի մանրադիտակային մասնիկներ, ինչը ևս կարող է հանգեցնել բերանի տհաճ հոտի: Ուստի լեզուն մաքրելը պետք է կանոնավոր լինի։

Լեզվի կանոնավոր մաքրումը նվազեցնում է բերանի խոռոչում պաթոգեն բակտերիաների քանակը, համի զգացողությունները դարձնում է ավելի վառ և ինտենսիվ, օգնում է հաղթահարել բերանի տհաճ հոտը։

Մաքրման գործընթացի ամենատարածված տեխնիկան հատուկ քերիչի կիրառումն է: Այն նրբորեն մաքրում է լեզվի մակերեսը՝ չառաջացնելով պատռվածքներ։ Կիրառելի են նաև ատամի խոզանակները՝ լեզուն մաքրելու հատուկ գործիքով։

Բերանի խոռոչի հիգիենայի մի քանի կանոն՝

սկսեք մաքրել լեզուն ատամները խոզանակելուց և բերանը ողողելուց հետո,

քերիչը տեղափոխեք լեզվի արմատից դեպի ծայրը,

մաքրեք մեղմ ճնշմամբ, որպեսզի չվնասեք լեզվի մակերեսը,

նույն ուղղությամբ մաքրեք նաև լեզվի կողային մակերեսները,

օգտագործելուց հետո մի մոռացեք լվանալ քերիչը։

Որպես կանոն, լեզվի հիգիենան տևում է ընդամենը 20-30 վայրկյան։